Ўзбекистон Намуналар бўйича қонунлар тўғрисидаги шартномани имзолади

Ар-Риёд шаҳрида Бутунжаҳон интеллектуал мулк ташкилоти (БИМТ) томонидан ташкил этилган дипломатик конференцияда Намуналар бўйича қонунлар тўғрисидаги шартнома (Design Law Treaty) лойиҳаси кўриб чиқилди ва Ўзбекистон томонидан имзоланди.

Фото: "Дунё" АА

Мамлакат номидан мазкур халқаро шартномани Ўзбекистон элчиси Нодир Турғунов имзолади.

Конференцияда БИМТга аъзо 193 та мамлакат иштирок этди.

Ушбу халқаро шартнома Ҳаага битимининг Женева акти билан тартибга солинмаган процессуал қоидаларни ўз ичига олиб, унинг мантиқий давоми ҳисобланади.

Намуналар бўйича қонунлар тўғрисидаги шартномага қўшилиш миллий саноат намуналарини чет эл давлатларида рўйхатдан ўтказишни осонлаштиради. Шунингдек, саноат намунасини рўйхатга олиш бўйича қонунчилик ҳужжатларини халқаро стандартларга мослаштириш имконияти вужудга келади.