Тошкентда Парламентлараро иттифоқ ижроия қўмитаси йиғилиши бўлиб ўтди

Тошкентда Парламентлараро иттифоқ ижроия қўмитасининг ташкилий масалалар юзасидан йиғилиши бўлиб ўтди. Йиғилишда Сенат раиси Танзила Норбоева кириш сўзи билан иштирок этди.

Сенат раиси ўз нутқида ПИ раҳбариятига, хусусан, Иттифоқ президенти Тулия Эксон ва бош котиб Мартин Чунгонг 150-юбилей ассамблеяни Ўзбекистонда ўтказишга розилик билдиргани учун миннатдорлик билдирди. Ушбу тадбирнинг ўтказилиши мамлакатдаги демократик ислоҳотларнинг халқаро даражадаги эътирофи экани таъкидланди.

Т.Норбоева ўз чиқишида ижтимоий адолат, камбағалликка барҳам бериш ва заиф қатламларни ҳимоя қилиш масалаларининг долзарблигини қайд этиб, бу борада парламентлар ўртасидаги ҳамкорликни кучайтириш муҳимлигига эътибор қаратди.

Шунингдек, Ўзбекистон парламентининг ПИ фаолиятидаги иштироки тобора фаоллашаётгани таъкидланди. Президент Шавкат Мирзиёевнинг “Барқарор ривожланиш мақсадларига эришишни жадаллаштиришда парламентларнинг ролини кучайтириш тўғрисида”ги БМТ Бош ассамблеяси резолюциясини қабул қилиш ҳақидаги ташаббуси ПИ томонидан тўлиқ қўллаб-қувватлангани қайд этилди.

ПИ ижроия қўмитаси фаолияти юқори баҳоланиб, унинг парламентлараро ҳамкорликни мустаҳкамлашдаги муҳим аҳамиятига урғу берилди. ПИ билан ўзаро ҳамкорлик доирасида Бухоро ва Тошкент шаҳарларида халқаро парламент форумлари ҳамда ПИга аъзо давлатлар парламентлари аёл раҳбарларининг 14-саммити муваффақиятли ўтказилгани ҳам таъкидланди.