Бухорода ишлатиб бўлинган бир марталик тиббий жиҳозлар одамларга пуллангани маълум бўлди

Дилшод Баракаев “Тошпўлатов Анвар Каримович” хусусий корхонасида тиббий буюмларни йиғиш менежери лавозимида ишлашидан фойдаланиб, мазкур корхонанинг бир маротаба фойдаланиладиган тиббий чиқиндиларини олиб кетиш бўйича хизмат кўрсатиш ҳақидаги шартномасини қўлга киритади ва уни сохталаштиради. Бу ҳақда “Ҳуқуқ” нашри ёзмоқда.

Компьютер техникасидан фойдаланган ҳолда корхонага тегишли юмалоқ муҳрнинг қалбакисини тайёрлайди. Кейин эса чиқиндиларни олиб кетиш бўйича хизмат кўрсатиш ҳақидаги сохта шартномани имзолатиб олади.

Дилшод Баракаев 2015 йилнинг 11 февралидан 1 сентябргача бўлган муддатда Бухоро вилоят кўп тармоқли тиббиёт маркази, вилоят кардиология диспансери, Бухоро, Ғиждувон, Когон шаҳар ва Когон туман тиббиёт бирлашмаларида бир маротаба ишлатиладиган тиббий жиҳозларни “ими-жими”да олиб кетаверади. Бухоро шаҳридаги эски “Қоракўл тери” корхонасидаги ижарага олган бинодан Тошкент шаҳрига тўғри келган юк машиналарда сотиш учун жўнатиб туради. Д.Баракаев нотаниш кишиларга ҳар бир шприцни 1000 сўмдан пуллайверади. Унинг зарарсизлантирилмаган тиббий жиҳозлардан юқумли касалликлар юқиши ва тарқалиши хавфининг ошишига сабабчи бўлади.

 Д.Баракаев қилмишига яраша Ўзбекистон Республикаси ЖКнинг тегишли моддалари билан жиноий жавобгарликка тортилди.