Мева-сабзавотлар етиштириш мумкин бўлган электрокар намойиш этилади

Швейцариянинг Rinspeed компанияси ўсимликлар етиштиришга мўлжалланган боғ билан жиҳозланган электрокар лойиҳасини тақдим этди. Бу ҳақда «Коммерсантъ» хабар берди.

Лойиҳа Oasis деб номланиб, унинг энг асосий ўзига хос хусусияти – рўпарадаги ойна тагида ўсимлик етиштириш мумкин бўлган махсус жойнинг борлигидир. Панель ўзининг иқлим-назорати ва гидропоникага эга бўлиб, унда мева-сабзавотлар ҳам етиштириш мумкин.

Электрокарда бошқарув ҳаракатлар ва овозларни таниш имконига эга бўлган эгик 5К-дисплейи ёрдамида амалга оширилади. Руль чамбараги эса йиғилиб, кичкина столчага айланиши мумкин.

Электрокарни илк бора Лас-Вегасдаги CES истеъмолчилар электроникаси кўргазмасида намойиш этиш режалаштирилмоқда. У 2017 йилнинг январь ойида бўлиб ўтади.