Аёл альпинист Жанубий Кореядаги энг баланд бинони забт этди

Жанубий кореялик аёл альпинист Ким Жейн ҳеч қандай мосламаларсиз 123 қаватли осмонўпар бинони забт этди, деб хабар бермоқда "Рёнхап" ахборот агентлиги. 

28 ёшли Жейн Жанубий Кореядаги 1-рақамли ва дунёдаги 5-рақамли энг баланд бино ҳисобланувчи Lotte World Tower’ни 2,5 соат ичида забт этди. Аёлнинг айтишича, бу жуда оғир бўлган, бироқ у жараёндан завқ олишга ҳаракат қилган.

Ахборот агентлигининг маълум қилишича, Жейн ажойиб жисмоний тайёргарликка эга. У 10 йилдан кўпроқ вақтдан бери турли мусобақаларда иштирок этиб келади ва жаҳон даражасидаги 25 та унвон соҳибаси ҳисобланади.