Перу парламенти президент импичментини тасдиқламади

Бир палатали Перу парламенти - конгресс - пайшанба куни қизғин муҳокамалардан сўнг мамлакат президенти Педро Кучинскининг коррупция можароси билан боғлиқ импичментини эълон қила олмади. Кучинскининг истеъфоси учун 78 депутат овоз берди, импичмент учун эса 87 нафар депутатнинг овози керак бўлади. 

Кучинскининг четлаштиришга доир таклиф бирйўла бир неча парламент гуруҳлари томонидан парламентга киритилган эди. Ҳужжат муаллифларининг фикрича, давлат раҳбари ўз баёнотларида ҳақиқатнинг бузилишига йўл қўйган. Бу Бразилиянинг Odebrecht қурилиш компаниясининг гўёки консультацион хизматлар учун  президентга тааллуқли фирмалар фойдасига 4,8 миллион долларлик тўловлари билан боғлиқ вазиятга тегишли. 

Импичмент муҳокамаси деярли 14 соат давом этди. Дастлаб президентнинг ўзи сўзга чиқди ва ўзининг айбсизлигини таъкидлади, шундан сўнг унинг адвокати баёнот берди, бундан ташқари, конгрессменлар – Кучинскининг тарафдорлари ва унга қаршилар чиқиш қилишди. Маълумотларга кўра, давлат раҳбари конгресс биносини кундузи - муҳокамалар бошланишидан аввал тарк этган.

Перу президентининг сўзларига кўра, у 1992 йилда ўзи томонидан асос солинган, молиявий консультацион хизматлар кўрсатиш билан шуғулланувчи Westfield Capital компаниясининг ҳозирги фаолиятига алоқадор эмас. Кейинчалик компания фаолияти учун Херардо Сепульведа жавоб берган, Бразилиянинг Odebrecht компанияси билан тузилган шартномаларнинг бари у томонидан имзоланган.

Кучински Перунинг Odebrecht билан алоқадорлик туфайли ноқулай вазиятда қолган иккинчи президенти ҳисобланади. Ундан аввалги президент - Ольянта Умала ҳам шунга ўхшаш вазиятда қолган эди.