Трамп кўринишидаги улкан жўжа шакли кемада сузишга олиб чиқилди (видео)

АҚШ президенти Дональд Трампни маҳбус жўжа кўринишидаги 10 метрлик пуфлама шакли 22 июлда Сан-Франциско соҳиллари яқинида кемада сузишга олиб чиқилди. 

Улкан шакл 00045 сони остидаги маҳбус кийимида тасвирланган бўлиб, 45 сони Трампнинг АҚШнинг 45-президенти эканига ишорадир. Кичик кемага ўрнатилган шакл соҳил бўйлаб олиб юрилиб, яна ортга қайтарилади.

Trump Chicken (Трамп жўжа) кампанияси сайтида маълум қилинишича, бу шакл Трампга карши “норозилик ҳаракати рамзи” сифатида Хитойда буюртма асосида яратилган ва илк бор АҚШда 2017 йил 15 апрелда Трампга қарши Сан-Францискодаги маршда пайдо бўлган. Шундан кейин бу шаклдан бир қатор бошқа норозилик акцияларида фойдаланилган. Норозилик кампаниясининг янги босқичи “Президент жўжани қамоққа жўнатамиз” шиори остида ўтмоқда.  

Кампания сайтида Trump Chicken номига қарамай, “00045-сонли маҳбус ва АҚШ президенти ўртасидаги ҳар қандай ўхшашлик тасодиф экани”, Трампнинг ушбу шаклга ҳар қандай қиёсланиши эса “ёлғон янгиликлардан энг ёлғони экани” кинояли тарзда маълум қилинган.