Андижон ИИБ жорий йилнинг тўққиз ойи давомида 24 минг мурожаатни кўриб чиқди 

Андижон вилояти ички ишлар бошқармасига фуқаролардан жами 24 минг 59 та мурожаат келиб тушган бўлиб, ушбу мурожаатларнинг барчаси масъул ходимлар томонидан атрофлича ўрганилган.  Мурожаатлардан 7 минг 627 таси қаноатлантирилган, 1 минг 743 та мурожаат бўйича муаллифларга тегишли тартибда тушунтириш берилган бўлса, 870 та мурожаат ҳозирда қўшимча ўрганилмоқда. Бу ҳақда KUN.UZ’га вилоят ИИБ Матбуот хизмати хабар бермоқда.

Ҳозирги кунда сайёр қабуллар одамларнинг дардини эшитиш, уларни қийнаётган муаммоларни, жойлардаги камчиликларни аниқлаш ва жойида ҳал этишда муҳим омилга айланди. 

Жорий йилнинг 8 ойи давомида вилоят ИИБ масъул раҳбар ходимларининг шахсий ҳамда сайёр қабулларида умумий 3 минг 34 нафар жисмоний ва юридик шахслар қабул қилинган.

Шунингдек, Андижон вилоят ИИБ бошлиғининг Пахтаобод, Қўрғонтепа, Бўз, Улуғнор ҳамда Балиқчи туманларида сайёр қабуллари ўтказилиб, унда 334 та мурожаат тингланиб, барчасига ижобий ечим топилган.