«Шўртан» ҳеч қандай натижа кўрсатмаган белоруссиялик мураббийларга 550 миллион сўм тўлади

Клубларимиз хорижлик (!) футболчи ва мураббийлар билан ўйламай тузилган шартномалар сабаб жарима тўлашда давом этишади. «Бунёдкор» жамоага ҳеч қандай натижа келтирмаган Сергей Симоненкога 50 минг доллар тўлагани ёдингизда.

Легионерлар борасидаги эндиги машмашалар марказида Ғузорнинг «Шўртан» клуби пайдо бўлди. 2012 йил Ғузор клубига белоруссиялик иккита мураббий келади. Игорь Криушенко жамоа бош мураббийи бўлади. Виталий Варвоньчик эса дарвозабонлар мураббийи этиб тайинланади.

Белоруссиялик бу мураббийлар «Шўртан»да бирор кўзга кўринадиган натижа қайд этмай биринчи даврадан сўнг жамоани тарк этишади. Ортларидан эса бир дунё қарз қолдиришади...

ПФЛ директори маслаҳатчиси Диёр Имомхўжаев ўзининг телеграм-каналида ёзишича, «Шўртан» яқинда бу мураббийларга 550 миллион сўм пул берган. Жумладан, Игорь Криушенкога 445 миллион, Виталий Варвоньчикка 105 миллион сўм тўлаб берган.

Бу пуллар 4 йил давомида пеня «туғгани» сабаб шундай катта қийматга келган. «Шўртан» бу билан қарзларидан қутулгани йўқ. Жамоа Криушенкога яна 248 миллион, Варвоньчикка яна 73 миллион сўм тўлаб бериши керак. Клуб Мурод Отажонов, Ёрқин Назаров, Сардор Хурсанов, Азиз Ғуломхўжаевдан ҳам қарзини узиши керак.

Таъкидлаш керак, Ёрқин Назаров ўтган мавсум Ғузорда ёш футболчилардан иборат яхши жамоа тузган ва Про-Лига жамоаларини кетма-кет енгиб мухлисларда яхши таассурот қолдирганди. Бироқ Назаров яна олдинги иш жойи «Бунёдкор» академиясигага қайтган. «Шўртан» айни дамда Сергей Ковшов мураббийлигида Про-Лига «А» гуруҳида қатнашишга тайёрланмоқда.

Маълумот учун, Игорь Криушенко ҳозирда Беларусь терма жамоаси бош мураббийи ҳисобланади.