Месси Бразилияга қарши ўйиндан кейин ҳакамни айблади

Аргентина терма жамоаси ҳужумчиси Лионель Месси Америка кубоги яримфиналида Бразилияга қарши кечган ва 0:2 ҳисобидаги мағлубият билан якунланган ўйиндан кейин ҳакамларга эътироз билдирди. Унинг фикрича, ҳакамлар ўйин давомида икки марта бразилияликлар дарвозаси томон пенальти белгилаши мумкин эди.

«Биз ўйинни яхши ўтказдик. Улар биздан яхшироқ эмасди. 

Бу турнирдаги ҳакамларнинг қарорларидан чарчадим. Бразилияликлар қўл билан ўйнашди, қўполликлар қилишди, аммо пенальти берилмади. Бу оқшомда ҳакам бирор вазиятда VAR хизматидан фойдаланмади. Бунга ақл бовар қилмайди.

Биз қаттиқ ҳаракат қилдик. Аммо ҳакам бразилларга бирорта карточка бермади, карточкаларини фақат бизга тарқатди. Ҳакам ўз қарорларида ноҳақ эди», дея Мессининг сўзларини келтирмоқда Ole манбаси.