«Импичмент савдойилари». Трампнинг адвокатлари демократларни айблади

АҚШ президенти Дональд Трампнинг манфаатларини ҳимоя қилувчи адвокатлар жамоаси унинг импичмент бўйича Сенатдаги эшитувга чақирилишига расмий жавоб қайтаришди. Ҳужжатда айтилишича, президент ўзига қарши қўйилаётган барча айбловларни рад этади, эшитувни эса у ғалаба қозонган сайлов натижаларини ноқонуний равишда бекор қилишга уриниш деб ҳисоблайди.

Хусусан, адвокатлар Трамп сайланганидан буён демократлар «импичментга муккасидан кетишгани» ва якунда назарий жиҳатдан Трампнинг ҳокимиятдан четлатилишига олиб келувчи жараённи бошлашганини таъкидлашган.

Импичмент иши Сенатга юборилди. Демократларда Трампга қарши янги далиллар бор

Ҳужжатда импичментнинг икки моддаси ҳам конституцияга терс келиши қайд этилган - хусусан, адвокатларнинг тасдиқлашича, икки модда ҳам президент қонун бузганини тасдиқловчи айблов таркибига эга эмас.

«Бу 2016 йилги сайлов натижаларини бекор қилишга ва 2020 йилги сайловга таъсир қилишга қаратилган сурбетлик ва қонун бузилиши ҳаракатидир», - дея ёзган ҳуқуқшунослар. Улар импичмент жараёнини «Америка халқининг ўз президентини эркин сайлаш ҳуқуқига ҳужум» деб аташган.

Адвокатлар Трамп ўзига қарши барча айбловларни қатъиян рад этиши ҳамда барча қонуний воситалар билан ўзини ҳимоя қилишини қайд этишган. Юристлар президент импичменти бўйича тақдимномани рад этишни сўрашмоқда.

Аввалроқ демократлар томонидан назорат қилинадиган АҚШ Конгресси Вакиллар палатаси Сенатга импичмент бўйича позицияси ифодаланган ҳужжатни тақдим этганди. Ҳужжат муаллифлари президентнинг айблари далиллар билан тасдиқланишини маълум қилишган.

Уларнинг фикрича, Трампа зудлик билан лавозимидан четлатилиши керак ва бу 2020 йилги президентлик сайловлари сайловолди кампанияси шаффоф ўтиши кафолати бўлади.

Вакиллар палатаси Сенатга импичмент ишини 15 январь куни жўнатди. Бу натижаси Дональд Трамп ўз лавозимида қолиш-қолмаслигини ҳал қиладиган жараёнга старт берилиши бўлди. Сенатда эшитув янги ҳафта бошида бошланиши кутилмоқда.

Қайд этиш керакки, Конгресс қуйи палатасида айбловлар тасдиқланиши давлат раҳбари ҳокимиятдан кетишини англатмайди - қарор юқори палатада (Сенат) қабул қилиниши керак.

АҚШ президенти лавозимидан четлатилиши учун Сенат аъзоларининг учдан икки қисми унга қарши овоз бериши талаб этилади. Аммо ҳозирда сенаторларнинг кўпчилик қисми республикачилар ҳисобланади ва импичментнинг ашаддий тарафдорлари ҳам Сенат президентни оқлаб қарор чиқаришига шубҳа қилишмаяпти.

Республикачилар етакчилари ҳам бир неча марта президентни қўллаб-қувватлашларини маълум қилишганди.

Вакиллар палатаси спикери Нэнси Пелосининг айтишича, демократлар импичмент эълон қилинганидан кейинги ўтган бир ой давомидаги танаффус вақтида президентга қарши янги ҳужжатлар, у қонунларни бузганига янги гувоҳликларни тўплашган.

АҚШ президенти ўз мансабини суиистеъмол қилиш ва Конгресс ишига халақит беришда айбланмоқда.