Ногиронликни белгилашда ҳалигача шифохонага ётиш талаб қилиняпти. Ҳукуматга парламент сўрови юборилади

Йиғилишда қўмита томонидан тиббий-меҳнат эксперт комиссиялари (ТМЭК) томонидан фуқароларни тиббий кўрикдан ўтказиш ва уларнинг ногиронлигини аниқлашга оид қонун ҳужжатларининг ижро этилиши ҳолати ўрганилгани, соҳада қатор муаммолар аниқлангани ҳақида сўз борди.

Қўмитаси раиси ўринбосари Маҳмуд Парпиев ўрганишлар давомида жойларда 2017 йил 1 декабрдаги «Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида»ги президент фармони билан тасдиқланган Комплекс чора-тадбирлар дастури ижроси таъминланмагани, жуда кўп ҳолатда ногиронлар турли қийинчиликларга дуч келаётгани аниқланганини маълум қилди.

Парпиев ногиронлар дуч келаётган муаммоларни санаб ўтди.

«Биринчи навбатда, ногиронликни белгилашда беморнинг албатта шифохонага ётиши керак, деб талаб қўйилаётгани. Ҳолбуки, президент фармони билан тасдиқланган махсус дастурда бу талаблардан воз кечиш кераклиги белгилаб қўйилган, лекин бу амалга оширилмаган.

Иккинчидан, техник реабилитация воситаларини бепул олиш учун тақдим этиладиган бир марталик тиббий хулоса бериш тартиби ҳалигача жорий этилмаган.

Қолаверса, ногиронлик белгилари яққол кўриниб турган фуқаролар техник реабилитация воситаларини бепул олиш учун мурожаат қилишганда кўп ҳолларда бунинг учун шифохонада даволаниб чиқиш ёки тиббий кўрикдан ўтиш керак, деган баҳоналар билан овора қилиб келинган», дейди сенатор.

Йиғилишда шу кунга қадар тиббий-меҳнат экспертиза хизмати фаолиятини тартибга соладиган ягона норматив-ҳуқуқий ҳужжат йўқлиги, тиббий-ижтимоий экспертизадан ўтказиш мезонлари ишлаб чиқилмагани, бу борада ҳалигача эски ҳужжатлардан фойдаланиб келинаётгани, бунинг оқибатида ногиронлиги рўйи-рост кўриниб турган шахслар ногиронликка ўтолмасдан қийналаётгани танқид қилинди.

«Ногиронликни аниқлаш ва белгилаш жараёнида ахборот-коммуникация технологияларидан фойдаланилмаслиги натижасида ҳали-ҳамон ногиронлар тиббий-меҳнат экспертизаси комиссияларига ўзлари ёки кимнингдир ҳамроҳлигида боришга мажбур бўлишмоқда.

Жойларда ногиронларга хизмат кўрсатиш қуввати тўғри белгиланмаган. Ўрганишларимиз давомида 2-3та туман учун битта туманлараро ТМЭК қўйиб қўйилган. Тиббий кўрикдан ўтиш тартибининг мураккаблиги аҳолининг ҳақли эътирозларига сабаб бўлиб келмоқда.

Ногиронлар тиббий кўрикдан ўтиш учун 8-10 кун сарфлашмоқда, жараён қонун ҳужжатлари билан тартибга солинмагани ортиқча оворагарчиликларга сабаб бўлмоқда», – деди Маҳмуд Парпиев.

Йиғилишда Тиббий меҳнат эксперт-комиссиялари томонидан фуқароларни тиббий кўрикдан ўтказиш ва уларнинг ногиронлигини аниқлаш масалалари юзасидан Вазирлар Маҳкамасига парламент сўрови юбориш ҳақида қарор қабул қилинди.

  Қўмита раиси Робахон Маҳмудова ногиронлиги бўлган шахсларнинг муаммолари доимий равишда ўрганиб келинаётгани ҳақида гапирди.

«Масалан, 2018 йилда ногиронларнинг таълим олишга оид ҳуқуқлари қанчалик таъминланаётгани ўрганилган ва ҳукуматга парламент сўрови юборилган. 2019 йили «Ўзбекистон Республикасида ногиронларни ижтимоий ҳимоя қилиш тўғрисида»ги қонуннинг Тошкент вилоятидаги ижроси ўрганиб чиқилган.

Бундан ташқари, Мурувват ва Саховат уйларида яшайдиган ногиронларга, шунингдек, кексаларга кўрсатилган тиббий хизматнинг ҳолати ўрганилган. Бу жараёнда қатор муаммолар аниқланиб, қўмита томонидан уларни бартараф қилиш чоралари кўрилган.

Бугун ушбу йўналишдаги ишларнинг мантиқий давоми сифатида фуқароларни тиббий кўрикдан ўтказиш ва уларнинг ногиронлигини аниқлаш масаласи ўрганиб чиқилди», – деди Робахон Маҳмудова.

• Ўзбекистонда ногиронлиги бўлган шахслар 700 мингдан ошди