Болгарияда коронавирус боис фавқулодда вазият жорий этилди: тартиббузарлар беш йилгача қамалиши мумкин

Озиқ-овқат дўконлари ва дорихоналардан ташқари кўнгилочар ва ўйин заллари, дискотекалар, барлар, савдо марказлари, умумий овқатланиш муассасаларига бориш тақиқланади. Барча таълим муассасаларида ўқиш тўхтатилади.

Фото: Reuters

Болгария парламенти коронавирус тарқалиши сабабли мамлакатда 13 мартдан 13 апрелгача фавқулодда вазият режими жорий этилишини маъқуллади.

Болгария президенти Румен Радев "болгарияликлар оғир вазиятда ўзларини оқилона тутишлари ва ваҳимага берилмасликлари"га умид билдирди.

Мамлакат соғлиқни сақлаш вазирлиги Болгария ҳудудида 29 мартгача амал қиладиган чекловлар рўйхатини эълон қилди.

Хусусан, озиқ-овқат дўконлари ва дорихоналардан ташқари кўнгилочар ва ўйин заллари, дискотекалар, барлар, савдо марказлари, умумий овқатланиш муассасаларига бориш тақиқланади. Мактаблар, университетлар ва бошқа таълим муассасаларида ўқиш тўхтатилади. Болалар боғчалари ёпилади. Барча кўринишдаги оммавий тадбирлар ўтказилиши тақиқланади.

Парламент карантин режимини бузганлик учун жазо жорий этди, тартиббузарлар беш йилгача озодликдан маҳрум этилиши ва 50 минг лёвгача (25 минг евро) жарима тўлайди.

Жума куни Болгарияда саккиз кишида коронавирус аниқланди. Ушбу инфекцияни юқтирганлар сони 31 кишига етди, икки киши вафот этди.

Болгарияда коронавирусга чалиниш билан боғлиқ дастлабки ҳолат 8 мартда аниқланганди.

Тайёрлаган Дилшод Аскаров

#Болгария #фавқулодда вазият #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.