БМТ ночор давлатларни коронавирусга қарши курашда қўллаб-қувватлаш жамғармасини ташкил этади 

Маъруза коронавирус пандемиясининг ижтимоий-иқтисодий оқибатларига глобал жавоб бериш мавзусига бағишланган.  

Таъкидланишича, БМТ жамғармани ўрта ва паст даромадли давлатларга коронавирус пандемияси билан боғлиқ фавқулодда вазиятга жавобан ҳаракат қилиш, уларга ижтимоий-иқтисодий шокдан тикланишга ёрдам бериш мақсадида ташкил этмоқда.

Маърузада 13 март куни Жаҳон соғлиқни сақлаш ташкилоти, БМТ жамғармаси ва Швейцария хайрия жамғармаси коронавирус оқибатларига жавоб берувчи ўзига хос илк жамғарма таъсис этгани маълум қилинган. Бу жамғарма дунёнинг исталган нуқтасидаги хусусий шахслар, корпорациялар ва ташкилотларга коронавирус ва унинг оқибатларига қарши кураш бўйича саъй-ҳаракатларда иштирок этиш учун бирлашишга имкон беради. 

“Йиғилган маблағлар соғлиқни сақлаш тизими ходимларига ўз ишини бажариш, беморларни даволаш ҳамда касалликни даволаш ва ундан вакцина яратиш соҳасидаги тадқиқотларни ўтказишга ёрдам беради. Бугунги кунда 200 мингдан кўпроқ хусусий шахслар ва ташкилотлар бу жамғармага ўз ҳиссасини қўшиб, 95 млн доллардан кўпроқ маблағ тўплашга муваффақ бўлинган”, дейилган БМТ бош котиби маърузасида.  

Аввалроқ Гутерреш дунёнинг энг ночор давлатларида коронавирусга қарши курашни молиялаштириш учун 2 млрд долларлик гуманитар жавоб режаси амалга оширилишини маълум қилган. Гуманитар режа доирасида ночор давлатларга вирус бор-йўқлигини аниқловчи тест ўтказиш учун зарур лаборатор қурилмалар ва беморларни даволаш учун дори-дармонлар етказилади. Бундан ташқари, ушбу давлатларда лагерлар ва аҳоли яшаш жойларида қўлларни ювиш учун станциялар ўрнатилади.