Лукашенко Беларусда коронавирусдан ҳеч ким ўлмаганини айтди

Беларусь президентининг таъкидлашича, ҳеч бир ҳолатда ўлим сабаби коронавирус бўлмаган, ҳамма гап беморларда аниқланган "сурункали касалликлар гулдастасида".

Фото: EPA / ТАСС

Беларусь президенти Александр Лукашенко мамлакатда ҳеч ким коронавирусдан ўлмаслигига ваъда берди.

"Хавотир олишмасин. Мамлакатимизда ҳеч ким коронавирусдан ўлмайди. Бу ҳақда омма олдида айтаман. Бунга қатъий ишонаман", — деди у.

Беларусь президенти коронавирус ҳеч бир ҳолатда ўлим сабаби бўлмаганлигини таъкидлади.

“Одамлар қўрқяпти. Шунинг учун уларга айтмоқчиман: мамлакатимизда бирорта ҳам инсон коронавирусдан ўлгани йўқ. Бирорта ҳам! Улар ўзларида аниқланган "сурункали касалликлар гулдастаси"дан ўлди”, деди у.

Лукашенконинг сўзларига кўра, одамлар юрак етишмовчилиги, қандли диабет, ўпка етишмовчилигидан вафот этмоқда.

“Яна шундай ташхислар борки, ҳатто ўқишга қийналаман. Бунга коронавирус ҳам қўшиляпти», — деди Беларусь президенти.

У Минск коронавирусга қарши халқаро тажрибадан келиб чиқаётганлигини айтди. Лукашенконинг билдиришича, беларусь шифокорларида коронавирусни даволаш учун дорилар жамланмаси мавжуд.

Охирги маълумотларга кўра, Беларусда COVID-19 коронавирусига чалинганлар 2578 кишини ташкил этади, 26 киши вафот этган.

Тайёрлаган Дилшод Аскаров

#Беларусь #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.