БМТда коронавирус Ғарбий Африкада очарчиликка олиб келиши мумкинлиги айтилди

Бу ҳақда БМТнинг Озиқ-овқат ва қишлоқ хўжалиги ташкилотининг (ФАО) Ғарбий Африка бўйича координатори Кумба Соу маълум қилди. 

Соу ФАО сайтида эълон қилинган интервьюда ушбу минтақада вазият жуда қалтис эканини таъкидлаб ўтган: унинг аҳолиси узоқ вақтдан бери очарчилик, иқлим ўзгаришлари, чигиртка ёпирилиши ва қуролли ихтилофлардан азият чекиб келади. Апрель ҳолатига кўра, Ғарбий Африкада 11 млн киши очарчиликда қолмоқда. Агар қатъий чоралар кўрилмаса, ёзда бу кўрсаткич 17 млнгача ошиши мумкин.

Европа пандемиядан секин-аста чиқаётган бир вақтда, Африка, кўринишича, энди унга кирмоқда. БМТнинг баҳолашича, энг ёмон вазиятда “қора қитъа”нинг бутун аҳолиси касалланиши, 3 млн киши эса вафот этиши мумкин. 

Соунинг таъкидлашича, коронавирус билан боғлиқ вазиятнинг янада ёмонлашиши озиқ-овқат маҳсулотлари нархининг ошишига ва озиқ-овқат захираларининг тугашига олиб келади. “Пандемия чуқурлашадиган бўлса, озиқ-овқат инқирози бу минтақада яна 50 млн кишига таъсир қилиши мумкин”, деб таъкидлаб ўтган мутахассис. Унинг айтишича,  инқироз биринчи навбатда аҳолининг энг заиф қатламлари – болалар ва аёлларга ҳамда кўчманчи чорвадорлар ва фермерларга таъсир қилади.

Соу ФАОнинг ушбу вазиятдаги устувор вазифаси фавқулодда муносабат чораларини сақлаб қолиш ҳисобланишини айтган. Ташкилот коронавирусдан азият чеккан хўжаликларга ёрдам беришни, мавсумлар ўртасида ижтимоий ҳимояни таъминлашни ва бозорлар фаолиятини қўллаб-қувватлашни режалаштирмоқда. 

Охирги маълумотларга кўра, Ғарбий Африкада 8 минг киши коронавирусга чалинган, 205 киши ундан вафот этган.