Сингапурда бир суткада коронавирусга чалиниш билан боғлиқ 500дан ортиқ ҳолат қайд этилди

Қайд этилишича, касаллик юқтирганларнинг аксарияти умумий ётоқхоналарда яшайдиган чет эллик ишчилар бўлиб, фақат олти киши сингапурлик ёки мамлакатда доимий яшовчи хориж фуқароларидир.

Фото: REUTERS / Thomas Peter

Сингапурда бир суткада коронавирусга чалиниш билан боғлиқ ҳолатлар сони 528тага ошди, мамлакатдаги беморлар сони 16 мингдан ошиб кетди. Бу ҳақда Сингаур соғлиқни сақлаш вазирлиги маълум қилди.

"30 апрель соат 12:00 ҳолатига Сингапурда яна 528та касаллик юқтириш ҳолати аниқланди", - дейилади вазирлик томонидан. Бир кун аввал 690 кишида касаллик аниқланганди.

Сингапурда коронавирусга чалинганлар сони 16169тага етган, 14 киши вафот этган.

Аввалроқ мамлакат коронавирус тарқалишини жиловлагани хабар қилинганди, аммо касаллик юқтириш ҳолатлари яна қайд этилиши давом этаётгани сабабли карантин муддати 1 июнгача узайтирилди.

Тайёрлаган Дилшод Аскаров

#Сингапур #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.