Қашқадарёда фуқаролар ўртасидаги ўзаро жанжал ўлим билан якун топди

2020 йилнинг 6 май куни соат 18:30да Косон туманида яшовчи фуқаро, 19 ёшли У.Д. ўзига олдиндан таниш бўлган, Қарши шаҳар “Ерқўрғон” деҳқон бозорида аравакашлик билан шуғулланувчи, Қамаши туманида яшовчи 47 ёшли А.Х. билан Қарши тумани “Сарой” қишлоғи Сарой кўчасидаги қурилиши тугалланмаган бино олди томонидаги майдонида спиртли ичимлик истеъмол қилишган.

Ўзбекистон Республикаси ИИВ ҳузуридаги Тергов департаменти хабарига кўра, У.Д. таниши А.Х. уни уятли сўзлар билан ҳақорат қилганлиги сабабли, чап қўлини мушти билан А.Х.нинг жағ, юз ва бўйин соҳаларига бир неча маротаба қасддан уриб, тан жароҳатлари етказган.

Оқибатда А.Х. оғир тан жароҳати олиши натижасида ҳодиса содир бўлган жойда вафот этган.

Ҳолат юзасидан Қарши шаҳар ИИО ФМБ 4-сон ИИБ ҳузуридаги Тергов бўлими томонидан Ўзбекистон Республикаси Жиноят кодексининг 104-моддаси 3-қисми “д” банди (одам ўлимига олиб келишига сабаб бўлган баданга қасддан оғир тан жароҳати етказиш) билан жиноят иши қўзғатилган.