Узун навбатлар ва 200 евролик тестлар: Европадаги халқаро аэропортлар карантиндан сўнг қандай ишлайди?

Европадаги халқаро аэропортлар раҳбарлари коронавирус сабабли жорий этилган хавфсизлик чораларига риоя қилиниши аэропорт ва авиакомпанияларнинг бутунлай ёпилишидан кам бўлмаган миқдорда молиявий зарар келтиради, деб ҳисобламоқда.

Хитроу аэропорти, Лондон

400 кишини (жамбо-жетлар сиғими) бир-биридан 2 метр масофада тутиб туриш бир километрлик навбатга олиб келади, дейди Хитроунинг Лондондаги офиси раҳбари Жон Холланд-Кей Bloomberg билан суҳбатда. Ижтимоий масофаланиш аэропортнинг ўтказувчанлик салоҳиятини 20 фоизга камайтиради.

Холланд-Кейнинг айтишича, йўловчиларни терминалга киришда коронавирусга текшириш оқилона йўл бўлади. У вакцина пайдо бўлгунига қадар ундай тартибда ишлашнинг имконсиз, деб ҳисобламоқда. 

Рейн-Майн аэропорти, Франкфурт

Франкфурт аэропортида одамлар бир-биридан камида 1,5 метр масофада бўлишлари учун юк бериш ва назорат-ўтказув пунктлари ҳудуди қайтадан лойиҳаланди. Полга махсус белгилар чизилди, юзлаб плакат ва экранлар эҳтиёт чоралари ҳақида эслатиб туради. Ҳар беш дақиқада бир неча тилда масофаланиш қоидалари тўғрисида эълон қилиб турилади.

Қоидаларга риоя қилиниши аэропорт ходимлари томонидан назорат қилинади. Бутун бино бўйлаб дезинфекцияловчи воситалар жойлаштирилган, ходимлар ва мижозлар ўртасига эса пластик тўсиқлар ўрнатилган.

Схипхол аэропорти, Амстердам

Схипхолда ҳар иккинчи рўйхатга олиш устуни ва самолётга чиқиш йўли ёпилган, ҳар бир рейсдаги юклар учун алоҳида конвейер лентаси ажратилади.

Франц-Йозеф Штраус номидаги аэропорт, Мюнхен

Мюнхен аэропортида ниқоблар, гигиеник салфеткалар ва бир марталик қўлқоплар сотиладиган автомат ўрнатилган.

Хельсинки-Вантаа аэропорти, Хельсинки

Хельсинки аэропортида ниқоби йўқларга ниқоб берилади ва йўловчиларни кутиб олгани келганлардан ўз автомобилларида қолиш ёки вақтинча ишламаётган терминалда кутиш сўралади.

Шарль-де-Голль аэропорти, Париж

Терминаллар ҳар куни кечқурун дезинфекция воситалари билан тозаланади. Лифтга фақат уч киши кириши мумкин. Париж аэропорти бир сонияда 16 кишининг ҳароратини ўлчайдиган Хитойда ишлаб чиқарилган ускуналарни синовдан ўтказмоқда.

Ўзини нохуш ҳис қилган йўловчилар тиббий кўрикдан ўтиши ва коронавирусга тест топшириши мумкин.

Вена-Швехат аэропорти, Вена

Вена аэропортида молекуляр-биологик тест топширган йўловчилар 14 кунлик карантинга жойлаштирилмайди. Аэропортдан учиб кетаётган йўловчилар тестдан ўтказилади ва соғломлигини тасдиқловчи ҳужжат олади.

Тестдан ўтиш учун аввалдан буюртма берилади, натижа уч соатга яқин вақт ичида чиқади. Тест топшириш нархи 190 еврога тенг.