Австрияда коронавирус юқтириш ҳолатлари кўпайганлиги сабабли янги чеклов чоралари киритилди

Эндиликда нафақат жамоат транспорти ва биринчи зарурат буюмлари дўконларида, балки барча дўконларда ҳамда мактабларда ниқоб тақиш мажбурий этиб белгиланди.

Фото: AFP

Австрия ҳукумати коронавирус юқтириш ҳолатлари сони ошганлиги сабабли ниқоб тақиш шарт бўлган жамоат жойлари рўйхатини кенгайтирди ва янги чеклов чораларини жорий этди. Бу ҳақда Австрия канцлери Себастьян Курц маълум қилди.

"Вазият яна жиддийлашмоқда. Кейинги ҳафталарда рақамлар ўсишда давом этди. Сизларни янада ҳушёр бўлишга чақираман", - деди Курц.

Курцнинг сўзларига кўра, эндиликда нафақат жамоат транспорти ва биринчи зарурат буюмлари дўконларида, балки барча дўконларда ҳамда мактабларда ниқоб тақиш мажбурий. 14 сентябрдан қаҳвахона ва ресторанлар официантлари ҳам ниқоб тақишлари шарт.

Бундан ташқари, канцлернинг айтишича, бино ичида 50дан ортиқ ҳамда очиқ ҳавода 100дан ортиқ киши иштирокида шахсий маросимлар ўтказиш тақиқланади.

Курц коронавирус тарқалиши суръати тезлашадиган бўлса, чоралар янада қатъийлаштирилишини айтди.

Австрияда охирги суткаларда 580 та янги касалланиш ҳолатлари аниқланди, икки киши вафот этди.

Мамлакатда пандемия бошланганидан буён 31,8 минг ҳолат қайд этилган, 750 бемор вафот этган.

Тайёрлаган Дилшод Аскаров

#Австрия #карантин

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.