«OMADLI KUN – 2»: Kun.uz ўтказаётган расмий танловни сохталари билан адаштирмасликка чақирамиз

Kun.uz 9 ноябрдан буён Telegram'да «OMADLI KUN – 2» акциясини ўтказмоқда. Хабарингиз бўлса, бу ҳақда сайт орқали ва ижтимоий тармоқлардаги саҳифаларда эълон берилган эди.

Акцияда қатнашиш учун Telegram'да махсус очилган ботни фаоллаштириб, Kun.uz сайти ва танлов ҳомийларига тегишли бир нечта каналларга аъзо бўлиш кифоя. Шундан сўнг танловга дўстларини ҳам таклиф этган иштирокчиларга улар орқали танлов қатнашчисига айланган ҳар бир дўсти учун 1500 сўмдан тўлаб борилади.

Шуни алоҳида таъкидлаймизки, иштирокчи тўплаган маблағи 50 минг сўмга етганда, маблағ унинг хоҳишига кўра телефон рақами ёки банк картасига ўтказиб берилиши кафолатланади. Акцияни ўтказиш учун Telegram'да @omadlikun_tanlovi2_bot боти ишга туширилган ва бу бот – танловда қатнашиш учун ягона расмий платформа саналади.

Афсуски, акция эълон қилинганидан сўнг, Telegram'да Kun.uz номидан сохта танловлар ташкил этувчи «уддабуронлар» пайдо бўлди. Улар «OMADLI KUN – 2» танлови баннеридан ноқонуний фойдаланган ҳолда, минглаб Telegram-фойдаланувчиларини алдаб, пулларини ўзлаштириб келишмоқда.

Фирибгарларни қандай таниб олиш мумкин?

Биринчи белги – Kun.uz томонидан ташкил этилган «OMADLI KUN – 2» акцияси махсус дастурланган @omadlikun_tanlovi2_bot боти орқали ўтказилади ва унда фақат расмий каналларга аъзо бўлиш шарти қўйилган. Фирибгарларнинг сохта танловларида эса каналларга эмас, балки гуруҳга одам жалб қилиш тарғиб қилинмоқда.

Қанчадир миқдорда танишларини ушбу гуруҳга жалб қилган иштирокчига пул ўтказиб бериш учун шахсий саҳифада ундан банк пластик картасининг суратини жўнатиш сўралмоқда. Банк пластик картасининг рақамини жўнатганлардан қатъий равишда картанинг суратини жўнатиш такрорий сўралмоқда.

Бу нега керак?

Гап шундаки, фирибгар ўзи алдаётган одамларни тунаб кетиши учун унга карта рақамидан ташқари, картанинг амал қилиш муддатини билиш ҳам керак бўлади.

Ушбу икки маълумотга эга бўлган фирибгар олдида ўз мақсадига етишда фақат бир қадам қолади. Яъни иштирокчининг картасидаги пулларни ечиб олиш учун юқоридаги маълумотлар киритилганида, иштирокчи телефонига парол келади. Фирибгар ушбу паролни қўлга киритиш учун иштирокчини «Ютуқ пулингизни олиш учун телефонингизга келган паролни бизга жўнатинг», дея алдашга уринади. Ушбу сўнгги алдовга ҳам учган иштирокчининг карта рақамидаги барча пуллар бир зумда «танлов ташкилотчиси»нинг чўнтагига ўтади.

Kun.uz томонидан ташкил этилган «OMADLI KUN» танловида эса белгиланган шартларни бажарган иштирокчининг ютуғини ўтказиб беришда фақат карта рақамининг ўзи сўралди. Картанинг сурати ёки унинг амал қилиш муддати каби махфий тутилиши керак бўлган қўшимча маълумотлар зинҳор талаб этилмайди.

Яна шуни ҳам билиш лозимки, Kun.uz томонидан ташкил этиладиган ҳар қандай танлов ва унда иштирок этиш шартлари, албатта, Kun.uz сайтида ва сайтнинг ижтимоий тармоқлардаги расмий саҳифаларида эълон қилинади.

Алдов қурбони бўлиб қолмаслик учун фуқаролардан юқорида тилга олинган жиҳатларга эътиборли бўлишни сўраймиз.

Ҳақиқий ва ютуқ кафолатланган акцияда иштирок этиш учун Telegram'да @omadlikun_tanlovi2_bot ботини фаоллаштиринг.