«МЮ» - «Ливерпуль» ўйини мухлисларнинг стадионга бостириб кириши ва оммавий норозилик намойишлари туфайли қолдирилди

Англия Премьер-лигаси 34-тури доирасидаги марказий учрашув - «Манчестер Юнайтед» - «Ливерпуль» ўйини номаълум муддатга қолдирилди. Бу ҳақда АПЛ расмий сайти расман маълум қилди.

Манчестердаги ўйин Тошкент вақти билан соат 20:30да бошланиши лозим эди. Бироқ кўп йиллардан буён «МЮ»нинг америкалик эгалари – Глейзерлар оиласидан клубни сотиб юборишни талаб қилаётган манчестерлик ишқибозлар «Ливерпуль»га қарши ўйиндан уч соат аввал «Олд Траффорд» ўйингоҳи атрофида оммавий намойиш ўтказган бўлишса, учрашувдан икки соат аввал оммавий тарзда стадион ичига бостириб киришга муваффақ бўлишди. Натижада қарийб бир соат давомида ўйингоҳ майдони, телекамераларга зарар етказилиб, стадионнинг ички қисмида ҳам тартибсизлик кузатилди.

Натижада ўйин ўз вақти – соат 20:30да бошланмаслиги маълум қилинди. Унгача стадион ичидаги норозилик намойишчилари полиция томонидан ўйингоҳдан чиқарилган, арена атрофидаги мухлислар тарқатилган бўлса-да, учрашув расмийлари ўйин вақтини белгилашмади. 

Сабаби стадион ичида мухлислар кирганидан кейин ўйингоҳда кенг кўламли дезинфекция ишлари олиб борилиши, майдон ҳолати яхшиланиши билан бирга клуб автобуслари келиши учун хавфсиз коридор ҳам яратилиши лозим эди. Шунга қарамай, бу пайтда «жамоамиз қачон ўйнашини биз ҳал қиламиз», дея бирлашган маҳаллий мухлислар клублар автобусини «Лоури» меҳмонхонасидан қўзғалишга йўл қўйишмади. Бу пайтда эса икки клуб ҳам таркибини эълон қилиб бўлган ва учрашув энг кечи Тошкент вақти билан соат 23:30да бошланиши мумкинлиги айтилганди.

Охир-оқибат ўйин бошланиши лозим бўлган вақтдан бир соат ўтиб, АПЛ «МЮ» - «Ливерпуль» учрашуви қолдирилганини расман эълон қилди. Учрашувнинг санаси бўйича расмий маълумот ҳали эълон қилинмаган бўлса-да, Sky Sports баҳс катта эҳтимол билан эртага, душанба куни ўтказилиши мумкинлигини тахмин қилган.

Эслатиб ўтамиз, «МЮ» Суперлигада иштирок этиши ҳақида эълон қилгач, клуб мухлисларининг Глейзерлар оиласига нисбатан нафрати қайтадан қўзғаган ва клуб лойиҳадан чиққанидан кейин янада авж олганди.

Маълумот учун, «МЮ» 67 очко билан АПЛ турнир жадвалида 2-ўринда бораётган бўлса, «Ливерпуль» 54 очко билан 6-ўриндан жой олган.