Эквадор Жулиан Ассанжни фуқароликдан маҳрум этди

Ассанжнинг адвокати Карлос Поведа суд қарорини шубҳа остига қўйган ва унинг устидан апелляция беришини айтган. Унинг таъкидлашича, суд Ассанжни фуқароликдан маҳрум этиш учун тақдим қилинган исботларни тегишлича баҳоламай ва текшириб ўтирмай, бор-йўғи 20 дақиқа ичида қарор чиқариб қўйган. Бундан ташқари, ҳозирда Британиядаги турмада сақланаётган Ассанж суд жараёнида қатнашиш имконидан маҳрум этилгани сабабли унинг ҳуқуқлари бузилган.

Эквадор ташқи ишлар вазирлиги суд “ишни кўриб чиқишда мустақил ҳаракат қилгани ва барча тартиб-қоидаларга амал қилганини” таъкидлаб ўтган.

Ассанж 2019 йил апрелда Эквадор ҳукумати томонидан сиёсий бошпанадан маҳрум этилгандан кейин мамлакатнинг Лондондаги элчихонаси биносида ҳибсга олинганди. У бу ерда Швецияга экстрадиция қилиниши мумкинлиги хавотири остида 2012 йилдан бери яшириниб келган. Собиқ журналист ҳозирда Белмарш турмасида сақланмоқда. 

Ассанжга АҚШда давлат департаментининг ўта махфий ҳужжатларини ошкор қилиш айблови қўйилмоқда. 4 январ куни Британия суди уни АҚШга бермасликка қарор қилган. Бироқ Лондон суди июлда Вашингтонга ушбу қарор бўйича шикоят беришга рухсат берган. Ассанжга АҚШда 175 йилгача қамоқ жазоси хавф солмоқда.