Ўзбекистонда «Спутник V» вакцинасининг иккинчи компоненти қолмаган. Расмийлар вакцина яқин орада олиб келинишини кутмоқда

Kun.uz таҳририятига бир неча кундан буён жойларда «Спутник V» вакцинасининг иккинчи компоненти қолмагани ҳақида мурожаатлар етиб келмоқда. Маълум бўлишича, поликлиника ва шифохоналарда эмланувчиларга вакцина тугагани ҳамда кутиш кераклиги айтилмоқда.

Сайт мухбири шу каби саволлар юзасидан Санитария-эпидемиологик осойишталик ва жамоат саломатлиги хизмати матбуот котиби Муҳаммаджон Бозоров билан боғланди. У айни вақтда Ўзбекистонда чиндан ҳам «Спутник V» вакцинасининг иккинчи компоненти қолмаганини тасдиқлади. Вакциналар яқин вақтлар ичида олиб келиниши кутилмоқда.

«Спутник V» вакцинасининг иккинчи компоненти охирги марта Ўзбекистонга олиб келинганда биринчисидан кўра камроқ эди. Шу сабабли ўртада бироз фарқ пайдо бўлди. Аммо тез орада унинг иккинчи дозаси олиб келинади. Бу узоғи билан 5-6 августгача бўлиши керак», деди у.

«Спутник V» вакцинасининг биринчи ва иккинчи компоненти орасидаги фарқ шифокорлар томонидан 21 кун деб тавсия қилинади. Хўш, вакцинанинг иккинчи дозасини қабул қилиш вақти келганлар нима қилиши керак? Муҳаммаджон Бозоровнинг шу мазмундаги саволга жавобан айтишича, аслида, вакцинанинг биринчи ва иккинчи компонентлари орасидаги вақт 6-12 ҳафтагача ҳам бўлиши мумкин.

«Юртдошларимиз эмлашлар орасидаги фарқдан қўрқиши керак эмас. Аслида вакцинанинг биринчи ва иккинчи компонентлари орасидаги вақт 6-12 ҳафта ҳам бўлиши мумкин, жадвал бузилмайди», деди Санитария-эпидемиологик осойишталик ва жамоат саломатлиги хизмати расмийси.

Ўзбекистонга шу пайтгача жами 12 миллион 580 минг 60 доза вакцина келтирилган. Шундан 370 минг дозаси «Спутник V», 710 минг дозаси AstraZeneca, 8,5 миллион дозаси ZF-UZ-VAC2001 ва 3 миллион 60 дозаси Moderna вакцинасидир. Аввалроқ Ўзбекистонга яна 1,7 млн доза «Спутник V» вакцинаси келтирилиши кутилаётгани маълум бўлганди.