Европа тарихида илк бор Исландия парламентида аёл депутатлар эркаклардан кўпроқни ташкил қилади 

Мамлакатнинг бир палатали парламенти – 63 ўринли Альтингга 33 аёл сайланган. Бу барча депутатларнинг 52 фоизини ташкил қилади. ОАВда таъкидланишича, Европанинг бирорта давлати парламентида ҳали аёл депутатлар 50 фоиздан кўпроқ ўрин эгалламаган. Бунгача Европа давлатлари орасида Швецияда фоиз ҳисобида аёл депутатлар сони энг кўп бўлган ва улар барча депутатларнинг 47 фоизини ташкил қилади.

Маълумотларга кўра, Исландиядаги сайловларда бош вазир Катрин Якобсдоттир бошчилигидаги ҳукмрон коалиция ғалаба қозонди.

Айни вақтда дунёда фақат бешта давлат парламентида аёл депутатлар улуши 50 фоиз ва ундан кўпроқни ташкил қилади, булар: Руанда (61 фоиз аёл депутат), Куба (52 фоиз), Никарагуа (51 фоиз), Мексика ва БАА (50 фоиздан).

Таъкидланишича, бир қатор давлатлардан фарқли ўлароқ, Исландияда парламентда аёл депутатлар сонига чеклов йўқ, бироқ баъзи партиялар ўз номзодларининг маълум қисминигина аёллар ташкил қилишини талаб қилади.

Исландия эркаклар ва аёллар тенг ҳуқуқлигини таъминлаш бўйича узоқ вақтдан бери дунёда илғор давлатлардан бири бўлиб келган. Бу ерда 1961 йилда жинсдан қатъи назар, меҳнатга бир хилда ҳақ тўлаш ҳақида илк қонун қабул қилинган. Бундан ташқари, Исландия 1980 йилда президенти аёл киши бўлган дунёдаги биринчи давлатга айланган.