“Иссиқлик электр станциялари” АЖ Қаршида ўтказилган саноат ярмаркасида 80дан ортиқ ҳамкорлик меморандумларини имзолади

Қарши шаҳрида “Нефть ва газ, электр энергетика, кимё, тўқимачилик ҳамда чарм-пойабзал саноати” минтақавий саноат ярмаркаси ўз ишини якунлади. Унда “Иссиқлик электр станциялари” АЖ ҳам фаол иштирок этди.

Саноат ярмаркасида “Иссиқлик электр станциялари” АЖ таркибидаги корхона ва ташкилотлар томонидан 160 турдаги маҳсулотлар намойиши ташкил қилинди.

Таъкидлаш лозимки, 2021 йилда маҳаллийлаштириш дастури асосида “Иссиқлик электр станциялари” АЖ корхоналари томонидан 98 турдаги маҳсулот ишлаб чиқарилиши лозим эди, ушбу белгиланган вазифа муваффақиятли бажарилди. 2022 йилда дастур доирасида 116 дан ортиқ лойиҳаларни амалга ошириш режалаштирилган.

Саноат ярмаркаси доирасида “Иссиқлик электр станциялари” АЖ корхоналари томонидан кооперация алоқаларини мустаҳкамлаш ва импорт ўрнини босувчи маҳсулотлар ишлаб чиқаришни ривожлантириш бўйича 80 дан ортиқ ҳамкорлик меморандумлари имзоланди.

Ярмаркани ташкил этишдан асосий мақсад маҳаллий корхоналар ўртасида кооперация алоқаларини мустаҳкамлаш, импорт ўрнини босувчи маҳсулотлар ишлаб чиқариш жараёнини такомиллаштириш, кичик бизнес ва хусусий тадбиркорлик субъектлари билан йирик саноат корхоналари ўртасидаги тармоқлараро кооперация алоқаларини янада кенгайтиришдан иборат.

“Иссиқлик электр станциялари” АЖ матбуот хизмати Ⓣ