Грузияда 9 нафар депутат Саакашвилини қўллаб-қувватлаб очлик эълон қилди

Грузия парламентининг мухолиф партиядан 9 нафар депутати собиқ президент Михаил Саакашвили қўллаб-қувватловига очлик эълон қилди. Улар 1 октябрдан бери очликни давом эттираётган ва шу сабабли соғлиғи ёмонлашган сиёсатчининг турма шифохонасига эмас, балки оддий шифохонага ётқизилишини талаб қилишмоқда.

“Биз ҳукумат шифокорларнинг Саакашвилини кўп тармоқли клиникага ётқизилиши бўйича тавсияларини эътиборга олмаётганига жим қараб тура олмаймиз. Бизнинг очлик эълон қилишимизга бошқа депутатлар ҳам қўшилади, деб ишонамиз”, деб айтган Саакашвили асос солган “Ягона миллий ҳаракат” партиясидан депутат Давид Киркитадзе.

Аввалроқ Саакашвилининг шахсий шифокори Николоз Кипшидзе собиқ президент оғир аҳволдалигини ва ўрнидан тура олмаётганини маълум қилган. Унинг фикрича, сиёсатчини шаҳар клиникасига ўтказиш лозим. Саакашвили ҳибсда ушлаб турилган тергов изолятори ходимларининг айтишича, сиёсатчи доимий тиббий кузатув остида қолмоқда ва шошилинч тиббий ёрдамга муҳтож эмас.

8 ноябрда Саакашвили яқинлари ва адвокатлари билан келишилмаган ҳолда Рустави шаҳридаги турмадан Тбилисидаги турманинг шифохонасига кўчирилганди.

13 ноябрда Грузиянинг собиқ президенти тарафдорлари Тбилисида норозилик намойиши ўтказиб, сиёсатчининг озод қилиниши ва оддий шифохонага ўтказилишини талаб қилишган.

Саакашвили 1 октябрда Украинадан Грузияга қайтгандан кейин ҳибсга олинганди. Сиёсатчи ўзини “сиёсий маҳкум” деб атаб, ўшандан бери ҳибсга олинишига норозилик сифатида очликни давом эттириб келмоқда.