Фарғонада 20 ёшли йигит пичоқланиб ўлдирилди

Марғилон шаҳрида фуқаро дўстлари билан йўлни тўсиб қўйган йигитлардан автомашиналарига йўл беришларини сўраб жанжаллашиши ўлим билан якунланди. Бу ҳақда ИИВ ҳузуридаги Тергов департаменти хабар қилмоқда.

Маълум бўлишича, 1 январь куни соат 3:30 ларда К.К. тўрт нафар таниши билан бирга М.Н. бошқарувидаги «Cobalt»га ўтириб, М.Н.нинг уйи томон ҳаракатланишганида кўча бошида тўхтаб турган «Gentra» ва «Nexia-3» автомашиналарни кўришган.

Уларнинг ёнида турган 23 ёшли М.А. ва унинг шерикларига автомашиналарига йўл беришларини сўраган вақтида жанжаллашиб қолишган. 

Жанжал давомида М.А. ўзининг ёнида бўлган пичоқ билан К.К.нинг кўкрак соҳасига бир марта уриб, шериклари билан автомашиналарига ўтириб, ҳодиса жойидан қочиб кетишган. К.К. олган тан жароҳатлари натижасида вафот этган.

Мазкур ҳолат юзасидан Фарғона вилоят ИИБ ҳузуридаги Тергов бошқармаси томонидан Ўзбекистон Республикаси Жиноят кодексининг 104-моддаси 3-қисми “д” банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилиб, М.А. процессуал тартибда ушланган.

Ҳозирда тергов ҳаракатлари олиб борилмоқда.

Аввалроқ Қўқон шаҳрида пулларни қўлга киритиш илинжида ухлаб ётган эр-хотинни пичоқлаб ўлдирган 3 нафар устага суд ҳукми ўқилгани ҳақида хабар берилган эди.