Путин Украинадаги ҳарбий ҳаракатлар қандай шарт билан тугашини айтди

Россия президенти Владимир Путиннинг айтишича, Украинадаги уруш Киев ҳарбий ҳаракатларни тўхтатса, тугайди. Бу ҳақда Путин туркиялик ҳамкасби Ражаб Тоййиб Эрдўған билан телефон суҳбатида айтган.

Фото: ТАСС

Кремль ахборот хизматининг маълум қилишича, Путин Украинадаги воқеаларни «Донбассни қутқариш операцияси» деб атаган. Путиннинг айтишича, Украинадаги Россиянинг ҳарбий ҳаракатлари Киев ҳарбий ҳаракатларни тўхтатиб, Россия томони қўйган шартларни тан олсагина тугаши мумкин.

Путин ҳарбий операция режа бўйича кетаётганини айтди. Эрдўған Путинга Украина билан мулоқотни давом эттиришини билдирди. Путин ҳам Россия мулоқотга тайёрлигини айтди.

Россия ва Украина ўртасидаги музокараларда ҳар икки томон ўз шартларини маълум қилганди. Россия Украинадан Қримни тан олишни, ДХР ва ЛХРни Донецк ва Луганск вилоятлари чегарасида тан олиб, нейтраллик эълон қилишини талаб қилмоқда.

Ҳозирча томонлар Беларусда икки марта музокара ўтказишди. Биринчи раундда ҳеч қандай келишув бўлмади. Иккинчи раундда эса гуманитар коридор бўйича келишувга эришилди. Бу келишув бир кун ҳам давом этмади, унинг бузилишида томонлар бир-бирини айблади.