«Биз қилаётган иш — одамларга ёрдам бериш». Путин — Украинадаги уруш ҳақида

Россия президенти Владимир Путиннинг айтишича, Украинадаги «махсус ҳарбий амалиёт» Донбассдаги одамларга ёрдам беришдек эзгу мақсадни кўзлаб бошланган. Бу ҳақда Путин Амур областидаги Восточний космодромига ташрифи вақтида гапирди.

«Биз бир томондан одамларга ёрдам беряпмиз, уларни қутқаряпмиз, бошқа томондан Россия хавфсизлигини таъминлаш учун ҳаракат қиляпмиз.

Бизда бошқа йўл қолмаганди, бу тўғри қарор бўлди. Украинада пайдо бўлган аксилроссия кучлари билан тўқнашув муқаррар эди, гап бу қачон содир бўлишида қолганди. Афсуски, неонацизм бизга яқин бўлган каттагина давлатнинг ҳаёт тарзига айланди.

Киев Минск келишувини амалга оширишдан очиқчасига бош тортгач, Донбассдаги одамларни геноцид қилишларига ортиқ чидаб бўлмасди. Махсус амалиётнинг барча мақсадлари тўлиқ амалга оширилади», деди Путин.

Россия президентининг айтишича, замонавий дунёда ҳеч кимни яккалаб қўйиб бўлмайди.

«Биз яккаланмоқчи эмасмиз. Замонавий дунёда ҳеч кимни кескин яккалаб бўлмайди, Россиядек катта давлат билан бундай қилиш эса аниқ имконсиз», деган Путин.

Космодромга беларуслик ҳамкасби Лукашенко билан бирга борган Путин икки мамлакат космик соҳада ҳамкорлик қилишини айтиб, коинотга беларуслик космонавтларни ҳам учириш бўйича россиялик масъулларга кўрсатма берди. Путин Россия Ойга чиқиш дастурини тиклашини ҳам айтди.