«Роскомнадзор» Россияда яна 25та сайтни блоклади

Блоклаш Украинадаги урушни тўхтатишга чақирувчи материалларни эълон қилувчи сайт, шунингдек, рус тилидаги Германия янгиликлари бўлган ресурсга таъсир кўрсатди.

Фото: Getty Images

Россия Бош прокуратурасининг талабига биноан 15 май, якшанба куни Россияда яна 25та сайт блокланди. Уларнинг рўйхати «Роскомсвобода» лойиҳаси томонидан эълон қилинган.

Блоклаш Voiny.net ресурсини ҳам четлаб ўтмади. Унинг яратувчилари фикрига кўра, «ресурс ҳарбий ҳаракатларни тўхтатиш ҳамда Россия ва Украина ўртасида тинчликни тиклаш учун позицияни ифодалашнинг турли усулларини бир жойда тўплайди». Шунингдек, Россиянинг Украинага бостириб киришини ёритувчи Pogibshieplennyeukraina.com сайти чекланди.

Бундан ташқари, Германия ҳақидаги янгиликларни рус тилида эълон қилувчи Germania.one сайти ва Украинанинг Kramatorsk.info ахборот ресурси блокланди.

Бир кун аввал, 14 май куни «Роскомнадзор» 34та сайтни, жумладан, «Кавказский узел»нинг иккита домени – kavkaz-uzel.ru ва kavkaz-uzel.media’ни чеклашга қарор қилди.

«Роскомсвобода» лойиҳасининг тушунтиришича, блоклашга қарор қилинган ҳаволаларга эга баъзи мақолалар кенгайтирилган HTTPS протоколи орқали реестрга киритилган. Шу сабабли, нафақат мақолаларнинг ўзи, балки уларни жойлаштирган сайтларга ҳам кириш чекланди.

Бундан олдин Украина билан уруш бошланганидан кейин Россияда 3000та сайт блоклангани хабар қилинганди.