Давлат бюджети ижроси тўғрисидаги ҳисоботлар парламентга юборилишидан олдин муҳокамага қўйилиши тўхтатилади

“Бюджет жараёни такомиллаштирилиши муносабати билан айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси эълон қилинди.

Қонун лойиҳаси 4 та моддадан иборат бўлиб, Маъмурий жавобгарлик тўғрисидаги кодекс ва Бюджет кодексига тегишли ўзгартириш ва қўшимчалар киритишни назарда тутади.

29- ва 97-моддаларда давлат бюджети ва давлат мақсадли жамғармалари бюджетлари ижроси тўғрисидаги ҳисоботлар Олий Мажлис палаталарига юборилишидан олдин улар жамоатчилик муҳокамасига қўйилиши амалиётига чек қўйилмоқда.

50- ва 51-моддаларда давлат бюджети маблағлари ҳисобидан резидент-юридик шахсларга берилган бюджет ссудалари, кредит линиялари ва чет давлатларга ажратилган кредитлар бўйича қайтариладиган асосий қарз суммаси даромад сифатида қабул қилинмаслиги белгиланмоқда. 50-моддада давлат бюджетига йўналтириладиган давлат божлари давлат бюджети даромадлари шакллантириш манбаси сифатида киритилмоқда.

52-моддада мобил алоқа хизматлари, тамаки ва алкогол маҳсулотлари учун акциз солиғи бўйича тушумлар тегишинча молия йилидан олдинги йил 1 июль ҳолатига кўра Қорақалпоғистон, вилоятлар ва Тошкент шаҳри аҳолиси сони республика аҳолиси сонидаги улушига мувофиқ Қорақалпоғистон республика бюджетига, вилоятлар бюджетларига ва Тошкент шаҳар бюджетига тўлиқ ҳажмда ўтказилиши белгиланмоқда.