Ўзбекистонда йўлдош алоқа тизимларидан фойдаланиш тартибига ўзгартириш киритилади

Ўзбекистон ҳудудида йўлдош алоқа тизимларидан фойдаланишни тартибга солишни такомиллаштириш мақсадида айрим қонун ҳужжатларига ўзгартиш ва қўшимчалар киритиш ҳақидаги қонун лойиҳаси эълон қилинди.

Қонун лойиҳаси мазмуни қуйидагилардан иборат:

“Давлат божи тўғрисида” қонун иловаси “Давлат божи ставкалари миқдорлари” 33-банди йўлдош алоқа тармоқларини лойиҳалаш, қуриш, фойдаланиш ва хизматларини кўрсатиш билан тўлдирилмоқда ва ушбу фаолият учун давлат божи миқдорлари белгиланмоқда, жумладан:

• транкли, радиотелефон, йўлдош алоқа тармоқларини лойиҳалаштириш, қуриш, улардан фойдаланиш ва уларга хизматлар кўрсатиш – БҲМ 135 баравари;
• транкли, радиотелефон, йўлдош алоқа тармоқларини лойиҳалаштириш – БҲМ 10 баравари;
• транкли, радиотелефон, йўлдош алоқа тармоқларини қуриш фаолиятини амалга ошириш – БҲМ 20 баравари;
• транкли, радиотелефон, йўлдош алоқа тармоқларидан фойдаланиш – БҲМ 30 баравари;
• транкли, радиотелефон, йўлдош алоқа тармоқларига хизматлар кўрсатиш фаолиятини амалга ошириш – БҲМ 80 баравари.

“Лицензиялаш, рухсат бериш ва хабардор қилиш тартиб-таомиллари тўғрисида” қонун 1-илова 32-позицияси 9-, 10-, 11-, 12-сатрлари йўлдош алоқа тармоқларини лойиҳалаштириш, қуриш, фойдаланиш ва хизматларини кўрсатиш билан тўлдирилмоқда, жумладан:

• кўчма радиотелефон (радиотелефон, транкли, йўлдош) алоқа тармоқларини лойиҳалаштириш;
• кўчма радиотелефон (радиотелефон, транкли, йўлдош) алоқа тармоқларини қуриш;
• кўчма радиотелефон (радиотелефон, транкли, йўлдош) алоқа тармоқларидан фойдаланиш;
• кўчма радиотелефон (радиотелефон, транкли, йўлдош) алоқа тармоқлари хизматларини кўрсатиш.

Қонун лойиҳаси қабул қилиниши орқали қуйидаги асосий мақсадларга эришилади:

• Ўзбекистон ҳудудида замонавий йўлдош алоқа тизимларидан фойдаланиш учун рухсат бериш тартиби белгиланади;
• республика ҳудудига йўлдош алоқа тизимлари ускуна ва терминаллари қонуний асосда олиб кириш ва фойдаланишга имконият яратилади;
• йўлдош алоқа тизимларини қонуний асосда тезкор-қидирув тадбирлари тизимларига уланиш масалалари ҳуқуқий ечимини топади;
• республикада глобал кўчма йўлдош алоқа тармоқлари хизматларидан (Starlink, Globalstar, OneWeb, Thuraya, Iridium, Inmarsat ва бошқалар) қонуний асосда, хавфсизлик талабларини бажарган ҳолда фойдаланиш имкониятлари яратилади ҳамда улардан ноқонуний фойдаланишга эҳтиёж қолмайди;
• йўлдош алоқа тизимларидан узоқ ва бориш қийин аҳоли масканларида, аҳоли яшамайдиган, чегара олди ҳудудларда, фавқулодда ҳолатларда фойдаланишга шарт-шароитлар яратилади.