Туркияда ўзбекистонлик аёл 3 йилдан буён бирга яшаётган эри томонидан шафқатсизларча ўлдирилди

Ҳодиса Истанбулнинг Баҳчелиэвлер туманида содир бўлган. Ўзбекистон фуқаросининг ўлимига сабаб бўлган жиноят 61 ёшли Ризо Белер исмли эркак томонидан содир этилган.

Турк матбуотидаги маълумотларга кўра, қотиллик қурбони бўлган 40 ёшли аёлнинг исми эса Умида Тўлаганова. Жуфтлик 2-3 йилдан бери бирга яшаб келаётгани айтилмоқда.

Ризо Белер прокуратурага берган кўрсатмасида қилмишидан пушаймон эмаслигини билдирган.

“Аввалдан олиб келиб қўйган тош билан унинг бошига урдим. У йиқилди. Аммо ҳали тирик эди. Ҳамма жойи қон эди. Мен қўлларини кесиб олдим. Мақсадим танасини тўлиқ бўлакларга ажратиб, жасаднинг ҳиди чиқмаслиги учун совиткичга солиб қўйиш эди. Аммо буни амаллай олмагач, эртасига арра сотиб олиб жасадни қисмларга ажратдим. Мен қилмишимдан пушаймон эмасман. Фақатгина бу ишни шу ойда содир этганимдан афсусдаман. У менга ташланиб қолди. Мен эса ўзим хоҳлаган ишни қилдим. Бу ишни олдиндан режалаштирмаганман”, деб айтган жиноятчи.

Хабарларга кўра, эркак аёлнинг елим халталарга жойланган жасадини кейинроқ турли чиқинди контейнерларига ташламоқчи бўлган.

Маълум бўлишича, Ризо Белер ва марҳуманинг ўртасида пул сабабли анчадан бери келишмовчилик бўлган. Эркакнинг кўрсатмасига кўра, у Умида Тўлагановадан 17 минг лира қарз олган, уни ўз вақтида қайтаролмагани учун ўртада жанжал юзага келган. Уйда жанжал овози эшитилган, шундан кейин қўшнилар полицияга мурожаат қилган.