«СБУ» украиналик асирнинг ўлдирилиши бўйича тергов бошлади

Интернетда рус аскарлари ҳарбий кийимдаги одамни ўлдираётгани акс этган видео тарқалди. «СБУ» жиноятчиларни топиб, жавобгарликка тортишга ваъда берди.

Украина Хавфсизлик хизмати («СБУ») 12 апрель, чоршанба куни интернетда россиялик ҳарбийлар украиналик асир экани айтилаётган шахсни ўлдираётгани акс этган видео эълон қилингани бўйича судгача тергов бошланганини билдирди. «СБУ»нинг аниқлик киритишича, тергов Украина Жиноят кодексининг 438-моддаси 2-қисми (Уруш олиб бориш қонунлари ва одатларини бузиш) асосида олиб борилмоқда.

«СБУ» раиси Василий Малюк айбдорларни топиб, жазолашга ваъда берди. «Биз бу ёвузларни топамиз. Агар керак бўлса, биз уларни ҳамма жойдан, қаерда бўлишидан қатъи назар: ер остидан бўлса ҳам топиб келамиз. Лекин улар қилган ишлари учун албатта жазоланади», - дея таъкидлади у.

Украина президенти Володимир Зеленский бутун дунё етакчиларини содир бўлган воқеага реакция билдиришга ва Украинага Россия билан урушда ғалаба қозонишга ёрдам беришга чақирди. 

11 апрель куни ижтимоий тармоқларда гўёки рус аскарлари украиналик аскарни шафқатсизларча ўлдиргани тасвирланган видео пайдо бўлди. Видео Россиянинг Украинага бостириб киришини қўллаб-қувватловчи Россия Telegram-каналларида ва Украина ижтимоий тармоқларида тарқалди. 

Видеодаги одамлар кимлар экани, ҳодиса қачон, қаерда ва ким томонидан ёзиб олингани номаълум. Видеодаги яшил ўт ва барглар видеонинг ўтган ёзда суратга олинганидан далолат беради. Видеонинг ҳақиқийлиги тасдиқланмаган.