Twitter бепул тасдиқлаш белгиларини олиб ташлашни бошлади

Twitter аккаунти учун пул тўламаган кўплаб машҳур шахслар тасдиқлаш белгиларини йўқотди. Бироқ компания эгаси Илон Маск баъзилар учун шахсан ўзи пул тўлаган. 

Twitter микроблоглар тармоғи 20 апрель, пайшанба куни аввал таниқли шахслар ва жамоат арбобларининг аккаунтларига қўйилган бепул тасдиқлаш белгиларини олиб ташлашни бошлади. Энди фақат пуллик обуначилар ўзларининг профилларида бундай белгига эга бўлишади - аммо ҳақиқий шахсни тасдиқламасдан. 

Аккаунтларида кўк фондаги оқ белги йўқолган машҳурлар орасида Рим папаси Франциск, АҚШ собиқ президенти Доналд Трамп, футбол юлдузи Криштиану Роналду, актриса Хэлли Берри ва кўплаб хонандалар, жумладан Леди Гага, Бейонсе, Шакира ва Жастин Тимберлейк бор. 

Аккаунтидан тасдиқлаш белгиси олиб ташланган хонанда Дайон Уорвик бу ҳаракатни танқид қилиб: «Энди ҳар ким мен бўлиши мумкин», деди. 

Шу билан бирга, илгари обунани бекор қилган баъзи машҳур одамлар, жумладан, ёзувчи Стивен Кинг ва баскетболчи Леброн Жеймс ўз тасдиқлаш белгиларини сақлаб қолишган. Twitter эгаси Илон Маск буни баъзи профиллар учун шахсан ўзи пул тўлагани билан изоҳлади. The Verge технологик блогига кўра, Жеймс Twitter’нинг обуна учун пул тўлаш таклифини рад этган, аммо белгини сақлаб қолган. Стивен Кинг ҳам пуллик обуначи эмаслигини ёзган. «Намасте, хуш келибсиз», деди Маск унга ҳинд тилида салом бериб.

2022 йил кузида Twitter’ни 44 миллиард долларга сотиб олганидан кўп ўтмай, Илон Маск тасдиқлаш белгиларини бериш жараёни «коррупциялашгани»ни айтди, шунинг учун энди ҳамма у учун пул тўлаши керак. Кўплаб машҳурлар эса Twitter’га обуна бўлишдан бош тортди.