Хитой компаниялари билан электроника йўналишида ҳамкорлик йўлга қўйилади

Ўзбекистонда электрон компонентлар ишлаб чиқарувчи янги қувват ишга туширилади.

Фото: Ўзэлтехсаноат

Хитойнинг Шандун провинцияси, Дечжоу шаҳри раҳбарияти вакиллари «Ўзэлтехсаноат» уюшмасига ташриф буюрди.

Уюшма раисининг биринчи ўринбосари Мансур Ҳошимов ва Дечжоу шаҳри делегацияси раҳбари Тян Вейдун ўртасида икки томонлама ҳамкорлик ва устувор йўналишларда биргаликда ишлаш масалалари муҳокама қилинди.

Уюшма мутасаддилари электротехника саноати бўйича Хитой Халқ Республикаси билан самарали ҳамкорлик алоқаларини кучайтириш орқали ҳар томонлама манфаатли мақсадларга эришишга тайёр эканини таъкидлади.

Учрашув давомида, Ўзбекистоннинг Bitmain Service ва Хитойнинг Huake Semiconductor CO компаниялари ҳамкорлигида мамлакатда электрон компонентлар ишлаб чиқарувчи янги қувватни ишга тушириш бўйича ҳамкорликда илмий-тадқиқот ишларини олиб бориш масалалари муҳокама қилинди.

Ушбу янги лойиҳа реализациясини тезлаштириш, ўз вақтида ишга туширишда ҳамкорлик қилиш, кўмак бериш бўйича тўрт томонлама англашув меморандуми имзоланди.