Baza: Анна Политковскаянинг қотиллиги ташкилотчиси Украинада жанг қиляпти

Анна Политковская қотиллигини уюштирганликда айбланиб 20 йилга ҳукм қилинган Сергей Ҳожиқурбонов урушда қатнашгани эвазига қамоқдан муддатидан олдин озод этилди, деб ёзади Baza. У 2022 йил охирида фронтга жўнаб кетгани айтилади.

Фото: AP

Baza Telegram-канали хабарига кўра, «Новая газета» журналисти Анна Политковская қотиллиги ташкилотчиси колонияни эрта тарк этган ва муддатидан олдин озод қилиш эвазига Украинага қарши урушга кетган. 20 йиллик қамоқ жазосига ҳукм қилинган Сергей Ҳожиқурбонов 2022 йил охирида фронтга йўл олган ва разведка бўлими командири сифатида хизмат қила бошлаган, деб хабар берди Baza 14 ноябр, сешанба куни номи ошкор этилмаган манбаларга таяниб.

Нашр суҳбатдошининг сўзларига кўра, Ҳожиқурбонов «бир неча бор душман сафи ортига ўтиб, ўз жангчилари билан разведкачиларга хос вазифаларни бажарган» ва тез орада баталён командири даражасига кўтарилган. Baza’нинг яна бир суҳбатдоши у собиқ маҳбус учун ноодатий тарзда жуда тез хизмат поғоналаридан кўтарилганини таъкидлади. Таъкидланишича, олти ой фронтда хизмат қилганидан сўнг, Политковскаянинг қотиллиги ташкилотчиси Россия Мудофаа вазирлиги билан шартномасини узайтирган. Бироқ нашрда унинг ҳозирда қайси лавозимда хизматда экани ҳақида маълумот йўқ. «Айни пайтда у жазони ўташдан озод қилинган», деб ёзади Baza.

Анна Политковскаянинг ўлдирилиши

Анна Политковская 2006 йил 7 октябрда Москванинг Лесная кўчасидаги уйининг кираверишида ўлдирилган. Россияда Политковскаянинг ўлдирилиши бўйича тергов узоқ вақт ва катта қийинчилик билан давом этди. 2014 йил май ойида суд жиноят содир этганликда гумон қилинган шахсларга ҳукм чиқарди. Рустам Маҳмудов умрбод қамоқ жазосига ҳукм қилинди. Унинг акалари Жабраил ва Иброҳим мос равишда 14 ва 12 йилга қамалди. 2007 йилда қўлга олинган собиқ полициячи Сергей Ҳожиқурбонов 20 йилга озодликдан маҳрум этилди.

Ташкилотчи сифатида ака-ука Маҳмудовларнинг амакиси бўлган чечен тадбиркори ва жиноят дунёсига алоқадор Лом-Али Гайтукаев тан олинган. У умрбод қамоқ жазосини олди ва 2017 йилда қамоқда вафот этди. Беш маҳкумнинг ҳеч бири айбини тан олмаган. 2018 йил июл ойида Инсон ҳуқуқлари бўйича Европа суди (ИҲЕС) Россияни Политковская иши бўйича «самарасиз тергов» учун танқид қилди. Журналистнинг яқинларига товон пули тайинланган.