Политковскаянинг фарзандлари: «Бу - адолатсизликнинг даҳшатли факти»

Журналист Анна Политковскаянинг фарзандлари Вера ва Иля «Новая газета» таҳририяти билан биргаликда 2014 йилда онасини ўлдиришда айбланиб, 20 йилга ҳукм қилинган Сергей Ҳожиқурбоновнинг қамоқдан муддатидан олдин озод этилиши ҳақида баёнот берди. Баёнот 14 ноябр, сешанба куни «Новая газета» сайтида эълон қилинди. 

«Биз учун бу «афв» - қотилнинг иқрори ва тавбаси эмас, балки адолатсизлик ва ўзбошимчаликнинг даҳшатли факти, ўз эътиқоди ва касбий бурчини бажаргани учун ҳалок бўлган шахс хотирасига нисбатан ҳақоратдир», - дейилади баёнотда. 

Баёнот муаллифларининг фикрига кўра, бундай «афв этиш» фактининг ўзи Россия амалдаги расмийлари қонундан ўзи хоҳлаганча фойдаланаётганидан далолат беради. «Қотилнинг афв этилгани ҳақида жабрланувчиларга ҳам, таҳририятга ҳам хабар берилмаган, худди бошқа қотилларни, энг аввало, қотиллик ташкилотчиси қандай қидирилаётгани ҳақида хабар бермаганидек. Уларни қидиришмаяпти, чунки уларни яширишмоқда», - дейди улар. 

«Адолат ҳокимиятни обрўсизлантиргани учун жазо камерасига тиқиб қўйилди» 

«Новая газета»да чоп этилган баёнотда афв этилган Ҳожиқурбоновнинг таржимаи ҳоли келтирилган. У Россия Ички ишлар вазирлигининг Москвадаги Уюшган жиноятчиликка қарши кураш бошқармаси капитани бўлган ва мансаб ваколатини суиистеъмол қилгани учун судланган. Политковскаянинг ўлдирилишини уюштирганлик айблови билан бир қаторда, у одам ўғирлаш ва қийноққа солишда ҳам айбланган. 

«Бу ерда изоҳ берадиган ҳеч нарса йўқ. Талаб қиладиган ҳеч ким йўқ. Адолат излашдан маъно йўқ - у ҳокимиятни обрўсизлантиргани учун жазо камерасига тиқиб қўйилди. Қотиллар эса ўзи ўрганиб қолган ишни қилади, жабрланувчилар, уларнинг қариндошлари ва яқинлари, гувоҳлар ҳамда улардан ёрдам сўраб, заиф эканини кўрсатиб қўйган суд, қонун ва давлатни масхара қиляпти», - дея таъкидлайди баёнот муаллифлари. 

Baza: қотиллик ташкилотчиси ўзини Украинага қарши урушда кўрсатди 

Baza Telegram-канали хабарига кўра, «Новая газета» журналисти Анна Политковская қотиллиги ташкилотчиси колонияни эрта тарк этган ва муддатидан олдин озод қилиш эвазига Украинага қарши урушга кетган. 20 йиллик қамоқ жазосига ҳукм қилинган Сергей Ҳожиқурбонов 2022 йил охирида фронтга йўл олган ва разведка бўлими командири сифатида хизмат қила бошлаган.

Нашр суҳбатдошининг сўзларига кўра, Ҳожиқурбонов «бир неча бор душман сафи ортига ўтиб, ўз жангчилари билан разведкачиларга хос вазифаларни бажарган» ва тез орада баталён командири даражасига кўтарилган. Таъкидланишича, олти ой фронтда хизмат қилганидан сўнг, Политковскаянинг қотиллиги ташкилотчиси Россия Мудофаа вазирлиги билан шартномасини узайтирган. «Айни пайтда у жазони ўташдан озод қилинган», деб ёзади Baza. 

Анна Политковскаянинг ўлдирилиши

Анна Политковская 2006 йил 7 октябрда Москванинг Лесная кўчасидаги уйининг кираверишида ўлдирилган. Россияда Политковскаянинг ўлдирилиши бўйича тергов узоқ вақт ва катта қийинчилик билан давом этди. 2014 йил май ойида суд жиноят содир этганликда гумон қилинган шахсларга ҳукм чиқарди. Рустам Маҳмудов умрбод қамоқ жазосига ҳукм қилинди. Унинг акалари Жабраил ва Иброҳим мос равишда 14 ва 12 йилга қамалди. 2007 йилда қўлга олинган собиқ полициячи Сергей Ҳожиқурбонов 20 йилга озодликдан маҳрум этилди. 

Ташкилотчи сифатида ака-ука Маҳмудовларнинг амакиси бўлган чечен тадбиркори ва жиноят дунёсига алоқадор Лом-Али Гайтукаев тан олинган. У умрбод қамоқ жазосини олди ва 2017 йилда қамоқда вафот этди. Беш маҳкумнинг ҳеч бири айбини тан олмаган. 2018 йил июл ойида Инсон ҳуқуқлари бўйича Европа суди (ИҲЕС) Россияни Политковская иши бўйича «самарасиз тергов» учун танқид қилди. Журналистнинг яқинларига товон пули тайинланган.

Қотилликка буюртма берганларнинг исми ҳалигача ошкор этилмаган. Россия нодавлат ОАВга кўра, қотилликнинг изи ва ҳолат бўйича кўплаб далиллар Чеченистоннинг юқори мартабали раҳбарларига алоқадор бўлган. 2021 йил 7 октябрда бу иш бўйича даъво муддати тугади.