Малайзияда икки ҳарбий вертолёт тўқнашуви оқибатида 10 киши ҳалок бўлди

Малайзияда икки ҳарбий вертолёт парад репетицияси вақтида тўқнашиб кетди, деб хабар бермоқда Malay Mail.

23 апрел куни Малайзия қироллик денгиз флотининг 90 йиллигига бағишлаб ўтказилиши режа қилинган парад олдидан ўтказилаётган тайёргарлик вақтида икки ҳарбий вертолёт тўқнашди. Натижада вертолётларда бўлган 10 кишининг барчаси ҳалок бўлган.

Тўқнашувда ўрта ҳажмли AgustaWestland AW139  вертолёти ҳамда унинг енгил аналоги Eurocopter Fennec  вертолёти иштирок этган. Вертолётлардан бири Лумутдаги авиабаза стадионининг кириш қисмига, иккинчиси бўлса авиабазанинг спорт мажмуаси сузиш ҳавзасига қулаган.

Эслатиб ўтамиз, 21 апрелда Япониянинг икки ҳарбий вертолёти ҳам ҳалокатга учраганди. Оқибатда бир киши ҳалок бўлган, 7 киши эса бедарак йўқолганди.