CNN: Путин ва Трампнинг учрашувига тайёргарлик тезлашиши мумкин

Москва АҚШ ва Россия ўртасидаги муносабатларни қайта тиклаш бўйича музокаралар яқин ҳафталарда давом этиши ва ҳатто тезлашишини кутмоқда.

Фото: AFP

Москва ва Вашингтон вакиллари иштирокида музокараларнинг биринчи раунди 18 феврал куни Саудия Арабистонида бўлиб ўтганди. CNN маълумотларига кўра, ҳозирда иккинчи раундга тайёргарлик кўрилмоқда ва у ҳам Форс кўрфази давлатларидан бирида бўлиб ўтади.

Қайд этилишича, икки давлат президентларининг учрашувига тайёргарликни тезлаштириш масаласи ҳам алоҳида муҳокама қилинмоқда.

Москва Оқ уйда Доналд Трамп ва Володимир Зеленский ўртасида юз берган баҳсдан кейин Россия—Украина урушини тўхтатиш бўйича музокаралар АҚШ ва Россия ўртасидаги фойдали иқтисодий битимлар муҳокамаси фонида иккинчи даражага ўтиб қолишини кутмоқда.

Доналд Трамп 12 феврал куни Владимир Путин билан телефон орқали мулоқот қилган ва шундан кейин «бирга ишлашга, хусусан, бир-бирининг давлатларига ташриф буюришга» келишиб олганини билдирганди. Бу АҚШ ва РФ президентининг 2022 йил февралдан бери илк мулоқоти эди.

Володимир Зеленский 28 феврал куни Оқ уйда Доналд Трамп ва унинг вице-президенти Жей Ди Вэнс билан учрашди. Музокаралар икки мамлакат етакчиларининг тортишуви билан якунланди. Зеленский Трампнинг сўровига кўра, Оқ уйни муддатидан олдин тарк этди. Томонлар Украинада нодир металларни қазиб олиш бўйича битимни имзоламади.

Зеленский Трамп билан тортишувдан кейин Украина Қўшма Штатлардан миннатдор экани ва уларнинг ёрдамини йўқотишни хоҳламаслигини маълум қилди, аммо Трампдан узр сўрамади. Эртаси куни у АҚШдан Буюк Британияга учиб бориб, Европа давлатлари етакчилари билан Украина масаласига бағишланган саммитда иштирок этди ва Британия қироли билан учрашди.