Малайзиянинг 11 йил олдин йўқолган MH370 рейсини қидириш ишлари вақтинча тўхтатилди
Мамлакат транспорт вазири қидирув ишлари жорий йил охирида яна тикланиши маълум қилинди.

Фото: AFP/Getty Images
Ocean Infinity компанияси Malaysia Airlines’нинг бундан 11 йил олдин йўқолган MH370 рейсини қидириш ишларини тўхтатди. Бу ҳақда Малазйзия транспорт вазири Энтони Локе маълум қилди.
«Улар [Ocean Infinity] операцияни вақтинча тўхтатди, қидирув ишлари жорий йил охирида қайта тикланади», — дейди вазир. Локенинг сўзларига кўра, ҳозир қидирув ишларини олиб бориш учун қулай мавсум эмас.
Куала-Лумпур – Пекин йўналишида MH370 рейсини амалга оширган Malaysia Airlines авиакомпаниясининг Boeing-777 самолёти 2014 йил 7 мартдан 8 мартга ўтар кечаси ҳавога кўтарилганидан бир соат ўтмай радарлардан ғойиб бўлган. Лайнер бортида 227 йўловчи ва 12 экипаж аъзоси бўлган. Тахминларга кўра, лайнер қулаган ва унинг қолдиқлари Ҳинд океанининг жанубий тубига ғарқ бўлган. 2015 йил январида Малайзия расмийлари бортдагиларнинг барчасини расман ҳалок бўлган деб эълон қилган.
Самолёт ёки йўловчилар ва экипаж аъзоларининг жасадларини топишга бўлган барча уринишлар ҳозирча муваффақиятсиз кечган. 120 минг километр квадрат майдонда олиб борилган сувости қидирув ишларида қолдиқлар изи топилмаган. Турли вақтларда турли жойларда йўқолган самолётга тегишли 27 та парча топилган. Бундан экспертлар машина парчаланиб кетган деган хулосага келган, бироқ улар бу ҳавода ёки сувга урилганда содир бўлгани ҳамда нима сабабдан юз берганини охиригача аниқлай олмаган. MH370 рейси тақдири сирлигича қолмоқда.
2015 йил ёзда Boeing самолётининг қанот қопқоғи, кейинги йилларда Африка соҳилларида ҳаво кемасининг яна 30 га яқин бўлаклари топилган. 2017 йилда мамлакатлар ўртасидаги қўшма қидирув ишлари янги маълумотлар йўқлиги сабабли тўхтатилган эди.
Ocean Infinity компанияси 2018 йилда ҳам қидирув ишларини амалга оширган, бироқ самолёт изини топа олмаган. 2024 йил мартда компания яна қидирув ишларини тиклашни таклиф қилди ва декабр ойида Малайзия ҳукумати бу борадаги янги шартномани маъқуллади.
Мавзуга оид

14:20 / 03.04.2025
Малайзия Ўзбекистонда яримўтказгичлар соҳасида махсус академия ташкил этади

16:10 / 31.03.2025
Ўзбекистон ва Малайзия яримўтказгичлар соҳасида мутахассислар тайёрлайди

12:07 / 29.03.2025
Малайзияда "Умра плюс Ўзбекистон" зиёрат туризм пакетлари жорий қилинади

08:40 / 29.03.2025