Ички ишлар вазири Ўзбекистон Волейбол федерациясига раис этиб сайланди

Ташкилотнинг навбатдан ташқари йиғилишида ички ишлар вазири генерал-майор Азиз Тошпўлатов Ўзбекистон Волейбол федерациясининг раиси этиб сайланди. Шунингдек, федерациянинг 8 та ҳудудий бўлимлари раислигига ушбу вилоятлар ИИБ бошлиқлари сайланди.

Фото: Ўзбекистон Волейбол федерацияси

9 апрел куни Ички ишлар вазирлиги академиясида Ўзбекистон Волейбол федерациясининг навбатдан ташқари конференцияси бўлиб ўтди. Унда Ички ишлар вазирлиги, Спорт вазирлиги, Миллий олимпия қўмитаси раҳбарияти, ҳудудий ички ишлар органлари масъуллари, Волейбол федерация мутасаддилари қатнашди.

ИИВ матбуот хизматининг маълум қилишича, йиғилишда Ички ишлар вазири, генерал майор Азиз Тошпўлатов номзоди Ўзбекистон Волейбол федерацияси раиси лавозимига таклиф этилган. Вазир номзоди конференция иштирокчилари томонидан бир овоздан маъқулланиб, федерация раиси этиб сайланган.

Шунингдек, Волейбол федерациясининг Андижон, Бухоро, Наманган, Қашқадарё, Сурхондарё, Сирдарё, Хоразм вилоятлари ва Тошкент шаҳар ҳудудий бўлимлари раислигига ушбу вилоятлар ИИБ бошлиқлари ва Тошкент шаҳар ИИББ бошлиғи бир овоздан сайланди.

Тадбир давомида «Беш ташаббус олимпиадаси» доирасида ўтказилиши режалаштирилган волейбол спорти бўйича «Ички ишлар вазири кубоги» мусобақаларига ҳам старт берилди.

2023 йил 18 феврал куни ўтказилган Ўзбекистон Волейбол федерациясининг навбатдан ташқари ҳисобот-сайлов конференциясида ўша вақтдаги ички ишлар вазири, генерал-лейтенант Пўлат Бобожонов федерация раиси этиб сайланган эди.

#федерация #Ички ишлар вазири #Волейбол