Истанбул собиқ мэри Имомўғли прокурорга таҳдид қилгани учун судланмоқда

11 апрел, жума куни Истанбул собиқ мэри ва Туркия мухолифати вакили, ҳибсга олинган Акром Имомўғли биринчи марта судга келтирилди. У шаҳар бош прокурорини ҳақорат қилиш ва унга таҳдид қилишда айбланмоқда. Бу ҳақда Reuters агентлиги хабар берди. Собиқ мэр етти йил-у тўрт ойга қамоқ жазосига ҳукм қилиниши мумкин.

Биринчи суд мажлисида Имомўғли ўз айбини рад этиб, унга қарши барча даъволар сиёсий сабабларга кўра эканлигини қўшимча қилди. «Мен Истанбулда учта сайловда ғалаба қозонганим учун шу ердаман. Мен 86 миллион (турк) халқининг қалбидаги президент бўлганим учун шу ердаман», — деди у. Иш бўйича навбатдаги суд мажлиси 16 июнга белгиланган.

Туркия президенти Ражаб Тоййиб Эрдўғаннинг асосий сиёсий рақиби ҳисобланган Акром Имомўғли 19 март куни порахўрлик ва жиноий ташкилот юритишда гумонланиб ҳибсга олинган эди. Туркиянинг давлатга қарашли Anadolu агентлиги хабар беришича, сиёсатчи террорчиликда айбланиб, тергов қилинмоқда. Хусусан, у Туркияда тақиқланган Курдистон ишчилар партиясини қўллаб-қувватлаганликда айбланмоқда.

23 март куни эрталаб Имомўғли суд қарори билан ҳибсга олинган. Шу куни Республика халқ партияси Имомўғлини Туркия президентлигига номзод қилиб кўрсатди. Праймеризлар давомида унинг номзодини 13,2 миллион фуқаро қўллаб-қувватлади — бу рўйхатга киритилган барча сайловчиларнинг қарийб 20 фоизи.

Имомўғлининг таъқиб қилиниши Туркияда 2013 йилдан бери энг йирик норозилик тўлқинига сабаб бўлди, деб хабар беради AFP. Reuters хабарига кўра, собиқ мэр ҳибсга олинганидан кейинги 10 кун ичида бутун мамлакат бўйлаб уни қўллаб-қувватловчи 220 га яқин намойишлар бўлиб ўтган.