UzAirways йўловчига махсус овқат бермагани учун жавоб беришига тўғри келди

Туркия фуқароси Uzbekistan Airways'нинг хизматидан шикоят қилиб, Ўзбекистон Рақобат қўмитасига мурожаат қилди.

Мурожаатда айтилишича, авиакомпаниянинг Анқара–Тошкент рейсида йўловчига унинг соғлиги учун муҳим бўлган махсус (глютенсиз) овқат берилмаган.

Бундан ташқари, мурожаатда самолёт салонининг санитария-гигиена ҳолати талабга жавоб бермагани – йўловчи ўтирган жойда олдинги рейсдан қолган чиқиндилар мавжудлиги ҳам кўрсатилган.

“Йўловчи чипта сотиб олиш чоғида ўз соғлиғи билан боғлиқ вазиятни олдиндан авиакомпания билан келишиб олган ва авиакомпания ушбу махсус овқат рейсда таъминланишини кафолатлаган эди. Бироқ, парвоз куни бу талаб бажарилмаган”, – дейилади Рақобат қўмитаси тарқатган хабарда.

Қўмита томонидан “Uzbekistan Airways” АЖга юборилган сўров бўйича ўтказилган хизмат текшируви натижасида йўловчи ҳақлиги, махсус овқат Анқара аэропортидаги кейтеринг хизмати томонидан етказиб берилмагани тасдиқланди.

Натижада, йўловчига етказилган маънавий ва моддий зарарни қоплаш мақсадида авиакомпания томонидан истеъмолчининг кейинги рейсида хизмат кўрсатиш классини бизнес-классга ошириш тўғрисидаги қарор қабул қилинди.

Шу билан бирга, самолёт салонидаги санитария-гигиена ҳолати бўйича ҳам масъул ташкилотга қўшимча назорат чоралари ўрнатилиши белгиланди, дейилади истеъмолчилар ҳуқуқларини ҳимоя қилиш органи ахборотида.