Air Cairo Мисрдан Фарғонага авиақатновлар йўлга қўймоқчи

Учрашувда Air Cairo авиакомпанияси томонидан Фарғона ва Мисрнинг Шарм-ал-Шайх шаҳри ўртасида мунтазам авиақатновлар йўлга қўйиш масаласи муҳокама қилинди.

Фарғона халқаро аэропортини хорижлик ҳамкорлар билан биргаликда давлат-хусусий шериклик асосида модернизация қилиш ва бошқариш лойиҳаси устида иш олиб борилаётганини маълум қилган вилоят ҳокими, Миср билан тўғридан тўғри авиақатновларнинг йўлга қўйилиши аэропортда йиллик йўловчилар оқимини кенгайишига, Миср билан Фарғона ўртасида ҳар томонлама ҳамкорлик алоқалари ривожланишига хизмат қилишини таъкидлаб, вилоят ҳокимлиги томонидан ҳар томонлама кўмак беришга тайёр эканликларини билдирди.

Ёз бошларида йўлга қўйилиши режалаштирилаётган қатновларга Транспорт вазирлиги ҳузуридаги фуқаро авиацияси агентлигидан рухсатнома расмийлаштиришни жадаллаштириш бўйича биргаликда иш ташкил этилишига келишиб олинди.

2003 йилда ташкил этилган Air Cairo чартер авиакомпаниясининг штаб-квартираси Қоҳирада жойлашган бўлиб, Мисрнинг миллий авиаташувчиси EgyptAir таркибига киради. 30 та замонавий лайнерларга эга бўлган авиакомпания ҳозирда Миср шаҳарларига, 30 га яқин давлатларга, шу жумладан, Тошкент шаҳрига жами 70 дан ортиқ йўналишларга парвозларни амалга ошириб келади.