Европадаги дастлабки мамлакат карантин чораларини юмшатиш режасини эълон қилди

Австрия ҳукумати коронавирусга қарши курашиш мақсадида жорий этилган карантин чоралари юмшатилиши бўйича режасини тақдим этди. 14 апрелдан айрим савдо нуқталарини очиш режалаштирилмоқда, деди мамлакат канцлери Себастьян Курц. 

Унинг сўзларига кўра, 14 апрелдан майдони 400 квадрат метргача бўлган дўконлар қатъий хавфсизлик чораларига риоя қилган ҳолда очилиши мумкин. 

«Бу ниқоб тақиш ва дезинфекцияга ҳамда харидорлар сони чекланишига тааллуқли», — деди Курц.

Канцлернинг аниқлик киритишича, апрель ўрталаридан боғдорчилик ва қурилиш моллари дўконлари ишлай бошлайди. Шу тарзда, Австрия карантин режими юмшатилишини эълон қилган Европадаги биринчи мамлакат бўлди. Бу ерда коронавирусга қарши кураш доирасидаги фавқулодда чоралар 16 мартдан кучга кирганди.

Курцнинг айтишича, 1 майдан яна кўплаб компаниялар иш бошлаши мумкин. Булар барча дўконлар ва савдо нуқталари бўлади. Май ўрталаридан ресторан ва меҳмонхоналар очила бошлайди. Мактабларда онлайн ўқишлар май ўртасигача давом этади, оммавий тадбирлар ўтказишга қўйилган тақиқ июнь охиригача амал қилади.

Австрия канцлери карантин чоралари фақат фуқаролар ижтимоий масофаланиш ва эҳтиёт чораларига риоя қилган тақдирдагина юмшатилишини таъкидлади. 

Ҳозирда Австрияда оммавий тадбирлар ўтказиш тақиқланган. Аҳоли жиддий сабабсиз уйдан чиқиши мумкин эмас ва тиббий ниқоб тақиши шарт. Мамлакатда коронавирусга чалинганлар сони 12 мингдан ортиқ бўлиб, 220 киши вафот этган.