Австрияда эмланмаганларга қарши локдаун киритилади

Австрия ҳукумати коронавирусга қарши эмланмаган барча фуқароларга нисбатан қатъий чекловлар киритмоқчи. Мамлакат канцлери Александр Шалленбергнинг маълум қилишича, ҳукумат ҳудудлар раҳбарлари билан муҳокамадан кейин бундай чораларни 14 ноябрдан киритишни мўлжалламоқда.

Канцлер аҳолининг эмланган учдан икки қисми қолган эмланмаганлар “касрига қолмаслиги кераклигини” айтган ва умуммиллий локдаун киритилиши ғоясини рад этган. Бироқ шу билан бирга, эмланганларга нисбатан ҳам қандайдир чекловлар киритилиши мумкин, аммо вирусга қарши эмланмаганлар Рождество ва Янги йилни “комфорт шароитлар”да кута олмайдилар.

Австрия етакчисининг таъкидлашича, мамлакатда эмлаш даражаси “шармандали даражада паст”. Айни вақтда австрияликларнинг 65 фоизи икки доза вакцина олган ва бу Европадаги энг паст кўрсаткичлардан бири ҳисобланади.

Австрияда охирги 7 кун ичида 67 мингдан кўпроқ касалланиш ҳолати қайд этилган ва бу мамлакат учун янги антирекорд ҳисобланади.