Бир йил аввал «Барселона» Мессидан айрилганди. Энди яна бир юлдузни «МЮ»га сотиши керак бўлади

Иқтисодиёт ҳиссиётларга қарши

Нидерландиялик яримҳимоячи Френки де Йонгнинг «Барселона»дан «Манчестер Юнайтед»га ўтишини Англия ва Испаниянинг таниқли инсайдерлари деярли амалга оширилган факт сифатида гапириб келишмоқда. Агар шундай бўлиб чиқса, буни ёзги трансфер бозоридаги энг парадоксал келишув деб аташ мумкин.

Дарҳақиқат, трансфердан 100 фоиз манфаатдор томон бу «қизил иблислар»дир, лекин бу пул ҳамма нарсани ҳал қиладиган вазият. Агар аниқроқ айтадиган бўлсак, уларнинг «Барселона»да йўқлиги.

Таққослаш бироз қўпол бўлса ҳам, воқеалар ўтган йилги Лионел Мессининг кетиши билан боғлиқ «достон»ни қисман эслатади. Ўшанда кўк-анорранглилар ўз афсонаси билан янги шартнома имзолаш имконига эга бўлмаган эди. Ҳатто аргентиналик футболчи текин ўйнашга рози бўлган тақдирда ҳам (Испания футбол қонунларига кўра, бу имконсиз) уни олиб қолишнинг иложи йўқ эди.

«Барселона» ҳозирда маблағга ўта муҳтож ва де Йонг катта қийматга сотиш мумкин бўлган ягона футболчидир. Бундан ташқари, клуб маошларнинг юқори чегараси белгиланган мураккаб шароитда қандайдир ечим излаб топишга маҳкум. Чунки де Йонгнинг маоши янги мавсумдан бошлаб йилига 19 миллион еврога ошиши керак.

Албатта, Педри ва Гави каби иқтидорлар бор, аммо Каталония пойтахти шартномаларида 1 миллиард евро товон пули белгиланган асосий истеъдодларини қурбон қилишга тайёр эмас. Де Йонгни эса минг афсуслар билан бўлса-да, сотиш мумкин.

Яқинда «Барса» президенти Жоан Лапорта футболчини сақлаб қолиш учун ҳамма нарсани қилишга тайёрлигини айтди. Аммо шу билан бирга, у иш ҳақи билан боғлиқ муаммолар борлигини, уларни ҳал қилиш лозимлиги ҳақида ҳам гапирди.

Клуб эса ҳатто янги трансферларни рўйхатдан ўтказа олмаяпти, каталонияликлар боши берк кўчага кириб қолишган.

Бош мураббий Хави 25 ёшли де Йонгнинг келажаги ҳақидаги саволларга жавоб беришдан чарчаган бўлса-да, трансфернинг муқаррар эканини англаб турибди.

«Френки биз учун муҳим ўйинчи ва уни деярли ҳар доим асосий таркибда майдонга туширганман. Аммо кўп нарса клубдаги иқтисодий ҳолатга боғлиқ. Де Йонг кўп йиллар давомида «Барселона»нинг асосий ўйинчиси бўлиб қолиши мумкин, аммо вазият қандай тус олишини кузатамиз», деганди Хави Испания чемпионати якунланишидан олдин.

Айни пайтда молиявий инқироз кундан кунга кучайиб бормоқда ва «Манчестер Юнайтед» каталонияликларнинг қўлларини қайириш имкониятига эга бўлмоқда.

«Барселона» умид қилаётган 100 миллион евро ҳақида гап сўз бўлиши мумкин эмас. Кўк-анорранглилар қайсидир босқичда иштаҳаларини 15 миллионга камайтирдилар. Инглизлар эса 65 миллион еврога урғу бериб, қолганини бонуслар сифатида тўлашга умид қилишмоқда.

Шу аснода Лапортанинг сўнгги баёнотлари «қизил иблислар» билан музокараларда нархни кўтаришга бўлган уринишдек туюлмоқда. Ёки президентга хос популизм сифатида. Чунки унинг истаклари рўйхатида «Лидс»дан Рафиньяни сотиб олиш, иштаҳасини пасайтирганга ўхшаётган Усмон Дембеле билан шартномани узайтириш ва яна кўп нарсалар бор. Аммо мураккаб иқтисодий шароитда бунга қаердан пул топиш мумкинлиги ҳақида хабар берилмаяпти. Балки «Барса»га бўлган «муҳаббати» туфайли де Йонг маоши кескин камайишига рози бўлишига умид қилиш керакдир?

Миллий жамоада яхшироқ

Услуб нуқтайи назаридан де Йонг – Хави «Барселона»га сингдирмоқчи бўлган футбол учун мукаммал ўйинчи. Бироқ нидерландиялик футболчининг каталонияликлар таркибидаги фаолиятини катта истисно билан ёрқин деб аташ мумкин.

Эрнесто Вальверде ҳам, унинг ўрнига келган Кике Сетьен ҳам Френкидан тўғри фойдалана олишмади. Идеалга энг яқини Рональд Куманнинг «Камп Ноу»даги биринчи мавсуми эди. Мураббий миллий жамоа яримҳимоячисини жуда яхши биларди ва унинг позициясини ҳам, майдондаги ролини ҳам тўғирлади.

Хавининг услуби фақат қоғозда силлиқ эди. Де Йонгнинг ўзи ҳам буни яширмади. Нидерландиянинг Миллатлар Лигасида Бельгия устидан қозонилган ёрқин ғалабасидан (4:1) сўнг, клуб ва миллий жамоада бошқача ўйнашини, ўзига кўпроқ «жигарранглилар» услуби мос келишини тан олди. Бироқ, Френки болалигидан «Барселона»ни орзу қилгани, танловидан афсусланмагани ва Каталония клубида қолишни хоҳлашини ҳар доим таъкидлаб келган.

«Бошқа жамоаларнинг қизиқиш билдириши ёқимли. Лекин ҳозир дунёнинг энг катта клубида ўйнаяпман. «Барселона»да ўзимни яхши ҳис қиляпман, шунинг учун... янгилик йўқ», - деди у «Манчестер Юнайтед» ҳақидаги саволга жавобан.

Бироқ, бу ибора шунчаки хушмуомалалик ишораси эди. Аслида де Йонг трансферни қатъий рад этиб келмоқда. Клублар бир неча раунд музокараларидан сўнг деярли қўл ташлашганида ҳам, футболчи фикридан қайтмаган. У Англияга кўчиб ўтишга қарши эканини нафақат «Барселона»га «содиқ»лиги билан, балки «Манчестер Юнайтед»нинг Чемпионлар лигасида ўйнамаслиги билан ҳам изоҳлаган.

Де Йонг учун асосий еврокубокда иштирок этиш имконияти, катта маош ва катта амбицияларни «ПСЖ» ҳам кафолатлаши мумкин эди. Аммо 2019 йилда Френки «Барселона»га ўтишни истади. Парижликлар эса уни қўлга киритиш борасида иккинчи марта ўйиндан чиқди. Аммо Эрик тен Ҳаг омили ушбу яримҳимоячи фикрини ўзгартириши мумкин.

«Аякс» рецептлари бўйича

«Аякс» собиқ бош мураббийининг «Манчестер Юнайтед»га тайинланиши де Йонгнинг трансфери тарихидаги муҳим лаҳзадир.

Айнан 52 ёшли мутахассис ўзининг собиқ футболчисини «Олд Траффорд»га ўтиш орқали янги имкониятлар эшиги очилишига, бир мавсум давомида Чемпионлар Лигасида иштирок этмаслик эса келажакда ўзини оқлайдиган қурбонлик эканига ишонтира олди.

Тен Ҳаг қандай аргументларни келтирганини фақат футболчи ва мураббий билади. Лекин де Йонг «иблислар»га керак эканига ишонч ҳосил қилган. «Барселона»да эса Гави ва Педри бор, Серхио Бускетс ҳам қолади, Френк Кессие билан шартнома имзоланди, демак нидерландиялик футболчига каталонияликлар жуда ҳам муҳтож эмас.

«МЮ»нинг янги бош мураббийи Френкининг имкониятларини бошқалардан яхшироқ билади, буни ҳамма тушуниб турибди. Бу фикрлар Англиядаги яна бир собиқ амстердамлик – «Эвертон»дан ижарадан қайтган Донни ван де Бекка ҳам тегишли.

Де Йонг билан биргаликда улар 3 йил олдин Чемпионлар Лигаси финали остонасида тўхтаган «Аякс»нинг ўрта чизиғидаги асосий футболчилар эди.  

Ўша жамоа тен Ҳагнинг ўрта чизиғи мукаммал созланган шахсий лойиҳаси эди. Албатта нидерландча рецептларни автоматик равишда ва сифат йўқотишларисиз Премьер-Лигага кўчириш мумкинлигига ишониш соддалик бўлади. Бироқ, «Манчестер Юнайтед» мухлисларига ван де Бек ва де Йонгнинг энг яхши ўйинларини кўриш насиб қилишига ишонгинг келади.

Де Йонг прессингдан қутулишни яхши билади, юқори аниқликдаги паслар билан машҳур ва тўпни ўзи билан олиб юра олади. Ван де Бек ўзининг энг яхши мавсумларида чизиқлар оралиғида деярли намунали ҳаракат қилган, жарима майдончаси олдидаги эркин ҳудудларга ёриб кирган. Агар бу яна иш берса, Бруно Фернандешнинг диспетчерлик маҳорати билан биргаликда «Манчестер Юнайтед»нинг ўйини яна жозибадор бўлиши мумкин.

Юқоридаги учлик худди радикал-ҳужумкордек туюлаётгани аниқ. Шу туфайли вариантлар ва янги трансферлар амалга оширилиши мумкин. Аммо Скотт МакТоминай ва Фред энг ёрқин «Аякс»нинг ўрта чизиғини цементлаб ташлаган Лассе Шёнедан яхшироқ кўринмоқда. Албатта тен Ҳаг учун таркибдаги де Йонг билан янги мавсум катта синов бўлади.

Нурмуҳаммад Саид таржима қилди