«Акция» деб ерларни ноқонуний эгаллаш, тезкор қурилиш қилиш ҳолатлари кўпайди – Кадастр агентлиги 

Ижтимоий тармоқларда ноқонуний уй-жойлар учун кадастр ҳужжатларини тайёрлашда «акция» бўлиши кутилаётгани тўғрисидаги хабарлар тарқалиши ортидан, ерларни ўзбошимчалик билан ноқонуний эгаллаб олиш ва қурилиш ишларини тезкор бошлаб юбориш ҳолатлари кўпайган. Бу ҳақда Кадастр агентлиги матбуот хизмати раҳбари Неъмат Отамуродов маълум қилди. 

«Кадастр ҳужжатларини тайёрлашда «акция» бўлиши кутилаётгани тўғрисидаги хабарлар ижтимоий тармоқларда жуда кўп тарқаляпти. Бу хабарларга бироз тузатиш киритиш керак. Сабаби, хабарларда кадастр ҳужжатларини тайёрлаш жараёни «акция» деб номланяпти. Аслида акция эмас», деди у. 

Қайд қилинишича, президент бошчилигида 27 октябр куни ўтказилган йиғилишда 2,4 миллионта хонадоннинг эгалик ҳужжати йўқлиги, агар уларнинг кадастр ҳужжати қилинса, одамларга ҳуқуқий, иқтисодий жиҳатдан ёрдам бўлиши айтилган. Шу боис, ҳужжатсиз уй-жойларга эгалик ҳуқуқини бериш бўйича қонун лойиҳасини ишлаб чиқиш топшириғи берилган. Отамуродовнинг таъкидлашича, «бугунги кунда қонун лойиҳаси ишлаб чиқиляпти». Кадастр ҳужжатларини тайёрлаш учун аризалар қанча муддатда кўриб чиқилиши ва тўлов миқдори қанча бўлиши фақат қонун қабул қилинганидан кейин маълум бўлади. 

Отамуродов сўзларига кўра, ижтимоий тармоқларда шундай мазмундаги хабарлар тарқалгач, ҳудудларда ерларни ноқонуний эгаллаб, тезкор қурилиш қилаётганлар учрамоқда. 

«Ижтимоий тармоқларда хабар тарқалганидан кейин, аҳоли ўртасида «уддабуронлар» кўпайди. «Тезкор иморат қуриб олиб, бу уйни 5-10 йил олдин қурганман деб иддао қилсам, ҳужжатлаштириб оламан», деб ўйлаб юрган бўлиши мумкин. Очиғини айтганда, улар хато ўйламоқда. Сабаби, Кадастр агентлиги томонидан ерларнинг ҳолатини ўрганиш бўйича космик съёмкалар, хариталар бор. Улар ёрдамида 5-10 йил, ҳатто 20 йил олдинги ҳолатни кўриб, текшириш мумкин», деди у. 

Отамуродовнинг таъкидлашича, бу жараёнда инсонлар ўзига зарар бериши мумкин. Чунки, ерларни ўзбошимчалик билан эгаллаб олиш, у ерга ноқонуний бино қуриш учун қонунчиликда маъмурий жавобгарликдан, жиноий жавобгарликкача чоралар белгиланган.